Brendan Ryan (Labour)
Link to this: Individually | In context

Cuirim fáilte roimh an Aire. Tá brón orm gur chomh déanach san oíche is atá sé ach ní orainne atá an milleán sin.

Táimid ag iarraidh a fháil amach cad ina thaobh go bhfuil moill ann faoin dul chun cinn atá ceadaithe ag an Roinn Oideachais agus Eolaíochta do Ghaelscoil Chloch na Coillte, a bunaíodh i 1994 agus a fuair aitheantas buan i 1997. Is scoil lán-ghaelach í, faoi phátrúnacht Fhoras Pátrúnachta na scoileanna lán-Ghaeilge. Bhíos féin i mo bhall de bhord an Fhorais Pátrúnachta i lár na nóchaidí.

Scoil réasúnta mór is ea í. Tá 230 daltaí sa scoil agus 25 fostaithe go lán-aimseartha inti, ach is trua go bhfuil sí lonnaithe i gcónaí i seomraí réamh-dhéanta. Níos measa ná san, tá costas €330,000 á íoc astu siúd gach bliain agus dualgas ar thuismitheoirí na ndaltaí 5% dá seo a bhailiú. Cheannaigh an Roinn suíomh agus tá sin ina seilbh aici. Fuair an scoil litir ón Roinn, dár dáta 12 Meán Fhómhair 2006, ag cur in iúil go bhfuil an tionscnamh réidh le dul go dtí an chéad chéim eile — pleanáil agus dearadh. Ach níl faic tarlaithe le ceithre mhí.

Tá an-bhuaireamh ar thuismitheoirí agus ar fhoireann na scoile faoin moill seo. Tá ceisteanna eile curtha acu ormsa. Tá ceisteanna faoi shábhaltacht agus slándáil na ndaoine ins na foirgintí réamh-dhéanta atá ag dul in aois agus tá ceist faoi airgead atá á chaitheamh ag an mbord bainistíochta chun an áit a choimeád tirim ón mbáisteach. Caitheadh €68,000 anuraidh amháin chun an áit a choimeád tirim.

Tá sé de dhualgas ar an Aire agus ar an Roinn cinneadh a dhéanamh, an rud seo a shoiléiriú agus a chinntiú go bhfuiltear chun leanúint leis an bhforbairt agus na hacmhainní a chur ar fáil chun an scoil nua atá tuillte agus atá ag teastáil a thosnú go luath.

Mary Hanafin (Dún Laoghaire, Fianna Fail)
Link to this: Individually | In context

Gabhaim buíochas leis an Seanadóir Ó Riain as ucht an cheist seo a ardú. Aithníonn an Seanadóir an tábhacht a bhaineann leis an gceantar seo de bhrí go bhfuil an daonra ag méadú go han-tapaidh ar fad. Mar a luaigh an Seanadóir, tá Gaelscoil Chloch na Coillte bunaithe le roinnt mhaith blianta agus níl suíomh buan aici go fóill. Mar is eol, tá sár iarracht á dhéanamh againn chun foirgintí scoile go léir a fheabhsú. Tá infheistíocht de €540 milliún á dhéanamh i mbliana agus déanfar infheistíocht de €4.5 billiún de réir an phlean forbartha náisiúnta. Beimid in ann an-infheistíocht a dhéanamh chun na scoileanna a fheabhsú agus chun cinn nua a fhorbairt.

Ina measc san tá scoil chomhoideachais, Gaelscoil Chloch na Coillte. Is cosúil, de réir na bhfigiúirí, gur fhás rollachán na scoile seo faoi thart ar 20% sna cúig bliana a d'imigh tharainn. Tá socraithe déanta ag rannóg fhoirgníochta scoileanna na Roinne gurb é an leibhéal cuí cóiríochta le soláthar na cion príomhoide agus dáréag múinteoirí gnáthranganna, chomh maith leis an gcóiríocht choimhdeach chuí. Cúis áthais dom a chur in iúil don Seanad go bhfuil láthair oiriúnach faighte anois, mar sin an rud is mó a chuireann moill ar fhoirgneamh. Tá láthair faighte anois chun gur féidir scoil 12 rangsheomra a thógáil a dhéanfaidh freastal ar riachtanais na scoile san fhadtréimhse. Ós rud é go bhfuil an láthair faighte, tá géar-aire á tabhairt do chur chun cinn an tionscadail seo sa Roinn, i gcomhthéacs an chláir um thógáil agus nuachóiriú scoileanna ó 2007 ar aghaidh.