Mr. P?id? ? S?:

Gabhaim mo leithscéal nach féidir liom a bheith i dteannta an chomhchoiste ach tá cruinniú cinn bliana againn anocht. Ní dóigh liom, leis an méid atá sa Bhille, go bhfuil puinn le rá agam ach is dócha gur rud a dúirt mé, an lá a chuala mé go raibh an briseadh síos leagtha síos ó thaobh cé mhéad a bheadh i ngach aon Ghaeltacht, ná go raibh ardú tagtha ar an méid daoine a bheadh ar an mbord ach go raibh ísliú tagtha ar an méid a bheadh thíos i gCiarraí, is é sin, uainne agus ó Chiarraí theas. Bhíomar beirt tógtha ó bhun go raibh a leithéid de rud tarlaithe agus ní thuigimid é ó thaobh na nGaeltachtaí atá láidir agus beo - níl mé ag cáineadh aon Ghaeltacht eile - ach tá an Ghaeltacht beo agus láidir fós i gCorca Dhuibhne. Chuir mé é faoi bhráid ár gcoiste. Bhí iarratas faighte againn ó Chiarraí theas a dtabharfaimis tacaíocht dó duine a bheith tofa i gCiarraí theas agus d'aontaíomar go ndéanfaimis é sin. Sin é mar a dúirt ár gcoiste. Is é an dara rud a tháinig amach mar rún i gcoiste an chomharchumainn agus is dócha go mbraitheann an pobal é, ná go mbeadh beirt eile i gCiarraí thiar. B'in é bun agus barr ár dtuairimí ar phéire na ndaoine a bheith tofa sna ceantair.

Ó thaobh eolais ar na comhairleoirí contae a bheith istigh, nó ceadaithe a bheith i mbun feachtais agus tofa ann, ach nach féidir leo a bheith ina gcomhairle contae ag an am céanna, fuair mé comhairle ón chomhairle contae áitiúil. Gan dabht, dúirt sí gur cheart do na comhairleoirí a bheith ar an dá bhord agus is é ceann de na tuairimí a bhí acu ná nach bhfuil na hoifigí fiontair áitiúil ag oibriú sna Gaeltachtaí agus aon obair a bheadh ar siúl, go háirithe i gCiarraí pé scéal é agus b'fhéidir go bhfuil an rud céanna sna contaetha eile, go mbíonn an chomhairle contae agus na comhairleoirí ceangailte leis.

Nuair a bhídís ar bhord Údarás na Gaeltachta, bhí an t-eolas acu ar aon obair a bhí ar siúl istigh i gCiarraí agus istigh sna Gaeltachtaí. Dá mba rud é go mbeidís ar an dá bhord, d’fhéadfaidís rudaí a bhaint amach le chéile. Nuair nach bhfuil an ceangal sin ann, b’fhéidir go gcaithfí féachaint ar conas an ceangal a dhéanamh nó ar cheart é a fhágáil mar a bhíodh agus na comhairleoirí a bhí tofa ar na boird cheana a bheith fós ann. Sin iad na tuairimí atá againn.