Aengus Ó Snodaigh (Dublin South Central, Sinn Fein) | Oireachtas source

Fearaim fáilte roimh chomhaltaí an chomhchoiste agus roimh Chomhaltaí eile atá ag freastal ar an gcruinniú. Aithním go bhfuil an Teachta Ó Cuív ag freastal ar Microsoft Teams. Is iad na finnéithe atá againn inniu ná Páidí Ó Sé, bainisteoir, Comharchumann Forbartha Chorca Dhuibhne, atá ag freastal ar Microsoft Teams. Chomh maith leis sin, tá Áine Uí Bheoláin, bainisteoir; Edel Ní Bhraonáin, gníomhaí teanga agus pobail; Fíona de Buis, gníomhaí pobail agus ball de thascfhórsa Uíbh Ráthaigh; Norma Moriarty, comhairleoir contae agus ball de thasfhórsa Uíbh Ráthaigh; Victor Bayda, pleanálaí teanga Uíbh Ráthaigh, Comhchoiste Ghaeltacht Uíbh Ráthaigh agus Eimear Ní Mhurchú, bainisteoir, Forbairt na Dromoda. Is mian liom a chur ar an taifead go bhfuil na finnéithe ag freastal ar an gcruinniú ó sheomra coiste 4 taobh istigh de phurláin Thithe an Oireachtais.

Sula dtosaím ar ár mbreithniú ar an ábhar grinnscrúdaithe réamhreachtaigh ar cheannteidil an Bhille um Údarás na Gaeltachta (Leasú), 2022, caithfidh mé na rialacha seo a leanas a léamh. Meabhraím do chomhaltaí, d’fhinnéithe agus do bhaill fhoirne a chinntiú go bhfuil a ngutháin shoghluaiste múchta le linn an chruinnithe mar gur féidir leis na gléasanna seo cur as do chóras craolacháin, eagarthóireachta agus fuaime Thithe an Oireachtais. Tá an rogha ag comhaltaí freastal ar an gcruinniú go fisiciúil sa seomra coiste nó go fíorúil ar Microsoft Teams ar an gcoinníoll, i gcás cruinnithe phoiblí, gur óna n-oifigí i dTithe an Oireachtais a dhéantar sin. Is riachtanas bunreachtúil é sin. Má tá comhaltaí atá ag freastal óna n-oifigí ag iarraidh caint, caithfidh an físeán a bheith ar siúl an t-am go léir. Ní ligfear comhaltaí isteach sa chruinniú chun caint mura bhfuil. Nuair nach bhfuil comhaltaí ag caint, caithfidh a micreafóin a bheith múchta chun déanamh cinnte de nach gcuireann siad as don chuid eile den chomhrá.

Cuirim ar aird na bhfinnéithe inniu go bhfuil siad, de bhua Bhunreacht na hÉireann agus reachtaíochta araon, faoi chosaint ag lánphribhléid maidir leis an bhfianaise a thugann siad don chomhchoiste chomh fad agus atá siad lonnaithe laistigh de phurláin Thithe an Oireachtais agus an fhianaise sin á tabhairt acu, ach is fíric é nach bhfuil finnéithe in ann braith ar an gcosaint sin má tá siad á tabhairt acu ó lasmuigh de phurláin Thithe an Oireachtais. Meabhraím d’fhinnéithe a bheith cúramach as an bhfianaise atá á dtabhairt acu. Má ordaítear éirí as an bhfianaise a thabhairt, is fiú é sin a dhéanamh láithreach. Ordaítear d’fhinnéithe gan aon fhianaise a thabhairt nach fianaise í a bhaineann le hábhar na n-imeachtaí atá á phlé ag an gcomhchoiste. Déanfar na ráitis tosaigh a chur ar fáil agus a fhoilsiú ar shuíomh ghréasáin an chomhchoiste tar éis na cruinnithe.

Fiafraítear d’fhinnéithe agus do chomhaltaí araon cleachtadh parlaiminte a urramú nár chóir, más féidir, daoine nó eintiteas a cháineadh ná líomhaintí a dhéanamh ina n-aghaidh ná tuairimí a thabhairt maidir leo ina ainm, ina hainm nó ina n-ainmneacha nó ar shlí a bhféadfaí iad a aithint. Chomh maith leis sin, fiafraítear dóibh gan aon rud a rá a d’fhéadfaí breathnú air mar ábhar díobhálach do dhea-chlú aon duine nó eintiteas. Mar sin, dá bhféadfadh a ráitis a bheith clúmhillteach do dhuine nó eintiteas aitheanta, ordófar do na finnéithe éirí as na ráitis sin láithreach. Tá sé ríthábhachtach go ngéillfidh siad leis an ordú sin láithreach, má eisítear é.

Iarraim ar Pháidí Ó Sé cur i láthair a dhéanamh.