Brendan Ryan (Labour)

Tacaím leis an leasú seo. Tá meon an Rialtais seo, agus b'fhéidir pé Rialtas a thiocfaidh ina dhiaidh, dírithe i dtreo príobháidiú chuid mhaith des na heagraíochtaí a chuireann seirbhísí poiblí ar fáil. Tá sé ar intinn Bord Soláthar an Leictreachais a phríobháidiú. Tá daoine in ard-bhainistíocht an chomhlachta san ag iarraidh go bpríobháideofaí é. Má déantar san agus má athraítear an eagraíocht san sa chaoi is gur eagraíocht príobháideach í, cad a tharlóidh don dualgas a cheapaimid atá uirthi faoi láthair gnó a dhéanamh trí Ghaeilge le pé duine a iarrann sin? Má leantar leis san beidh an córas teileafóin agus an córas soláthar leictreachais príobháidithe agus beidh siad ábalta éalú ó na dualgais atá ar comhlachtaí poiblí.