Mairéad Farrell (Galway West, Sinn Fein) | Oireachtas source

Tá mé an-bhuíoch as an deis labhairt faoi thábhacht na Gaeilge sa Gaeltacht agus Seachtain na Gaeilge faoi lánseol. Ar ndóigh, labhraíonn muintir na Gaeltachta agus lucht na Gaeilge an teanga chuile lá den bhliain. Tá sé fíorthábhachtach, áfach, go dtapaíonn muid an deis chun cinntiú go bhfuil muid ag tabhairt na tacaíochta atá ag teastáil uathu, agus ó na hoifigigh pleanála teanga, na coistí agus na pobail dheonacha atá taobh thiar dóibh atá ag obair sna limistéir phleanála teanga, sna bailte seirbhíse Gaeltachta agus sna líonraí Gaeilge sa Tuaisceart agus sa Deisceart, go háirithe sna dá bhaile seirbhíse Gaeltachta agus an deich limistéar i mo Dháilcheantar féin, ó Bhaile Chláir na Gaillimhe go Cloch na Rón, agus ó na hOileáin Árainn go Dúiche Sheoighe.

Chomh maith leis sin, caithfidh muid a chinntiú gur féidir le gnáthphobail na Gaeltachta fanacht sa Ghaeltacht. Tá bánú na Gaeltachta ag tarlú. Sin an fáth go bhfuil an feachtas, BÁNÚ, ann de bharr nach bhfuil daoine in ann fanacht ina gceantair féin. Chuala muid an seachtain seo arís é. D’ardaigh bean óg, Caitríona Ní Chualáin, an cheist seo arís. Níl sí in ann tógáil ina ceantar féin in Indreabhán. Níl daoine in ann teach a thógáil ná teach a fháil ar cíos agus níl siad in ann teach a cheannach. Tá sé fíorthábhachtach go mbeidh sé seo i gcroílár aon phlean atá ag an Rialtas seo don Ghaeltacht le go mbeidh daoine in ann fanacht sa cheantar agus teaghlach a thógáil ann.

See this speech in context