Aindrias Moynihan (Cork North West, Fianna Fail) | Oireachtas source

Ar an gcéad dul síos, glacaim leis gurb é an tAire Oideachais agus Scileanna an ceannródaí maidir leis seo ach, mar Aire Stáit a bhfuil freagracht air as an nGaeltacht agus as an nGaolainn, is ar an Teachta Kyne atá an fhreagracht chun a chinntiú go bhfuil an straitéis á comhlíonadh agus go bhfuil freastal á dhéanamh ar mhuintir na Gaolainne. Tá an t-éileamh ann. Glacaimid go léir leis sin. Feicfimid go bhfuil bearna mhór ann ó thaobh an éilimh sin. Níl ach thart ar 10% de na scoileanna ar fad, idir bunscoileanna agus iar-bhunscoileanna, ina scoileanna lán-Ghaelach in ainneoin go bhfuil thart ar 23% de dhaoine sásta freastal ar an sórt scoile sin de réir staidéar de chuid an ESRI. Mar a luaigh an tAire Stáit, tá dhá scoil nua aitheanta ag tosach na bliana, ach ní líonfar an bhearna sin riamh má leantar leis an ráta sin - dhá scoil as deich. Caithfidh go mbeidh níos mó ann go práinneach. Deineadh an patrúnacht sin a scaoileadh ag tús na bliana in ainneoin go raibh a fhios againn go raibh bearna ann anuraidh. D'fhéadfaí a bheith tar éis feabhas a chur ar an scéal dá mba rud é go raibh níos mó práinne. Iarraim ar an Aire Stáit luí go daingean ar an Aire Oideachais agus Scileanna agus a chinntiú go mbeidh dul chun cinn anseo go práinneach.

See this speech in context