Brendan Howlin (Wexford, Labour) | Oireachtas source

Tá a fhios ag an gCeann Comhairle go raibh díospóireacht againn sa Teach seo tráthnóna aréir ar an nGaeilge, ar staid na teanga agus ar an nGaeltacht. Dúirt mé sa díospóireacht sin gurb é mo thuairim féin ná gur theip muid mar Stát agus mar chóras oideachais an teanga a chur chun cinn ó bhunú an Stáit. Caithfidh go bhfuil sé sin fíor agus is ait an rud é. Ní dóigh liom go bhfuil tír ar bith eile ar fud an domhain ina bhfuil córas oideachais ann nach bhfuil sé ar chumas na ndaltaí sa chóras sin an teanga a labhairt go líofa tar éis deich mbliana á foghlaim. Ba chóir go mbeadh siad in ann an Ghaeilge a labhairt go líofa agus go flúirseach tar éis an méid sin ama a chaitheamh á foghlaim. Tá fadhb ann agus caithfimid an fhadhb sin a réiteach. Is mar sin atá an scéal againn in Éirinn.

Tá ceist agam ar an Taoiseach agus orainn go léir mar ní dóigh liom gur cheist don Rialtas amháin é. Mar a dúirt mé, téann an teip seo siar go dtí bhunú an Stáit seo agus caithfimid rud réabhlóideach agus nua a dhéanamh chun go mbeadh sé ar chumas mhuintir na tíre i gcoitinne an teanga dúchais a labhairt. Caithfimid, i dtosach báire, an deis sin a thabhairt don aos óg sa tír seo.

See this speech in context