Trevor Sargent (Dublin North, Green Party)

Ar dtús báire ba mhaith liom a ghuí go n-éireoidh go geal leis an Aire agus le hAire Stáit na Roinne ins an chéad chéim eile den Rialtas — an céim dheireannach, déarfainn.

Tá a fhios agam nach féidir rudaí a dhéanamh thar oíche i gcomhthéacs athrú bunúsach in úsáid na teanga mar shampla. Mar sin féin, nach gceapann an tAire go mbeadh sé cabhrach, mar shampla i gcás Ombudsman na Leanaí nuair nár luadh Gaeilge mar riachtanas don phost, a rá go mbeadh eolas ar Ghaeilge ina bhuntáiste? Nach gceapann sé go mbeadh cumas oibre trí Ghaeilge ina ghné de fhostú amach anseo má tá ciall nó éifeacht taobh thiar den pholasaí a théann leis an Acht teanga? An bhfuil an tAire sásta a rá go poiblí gur buntáiste í an Ghaeilge ag iarrthóirí, go mórmór má aithnítear stádas na Gaeilge san Aontas Eorpach agus i gcomhthéacs polasaí dátheangach ina Roinn féin agus, le cúnamh Dé, i ngach Roinn eile?

Ba cheart go mbeadh cumas oibre trí Ghaeilge á mheas i ngach aon oifig, ní hamháin i Roinn an Aire ach i ngach Roinn eile. Caithfear a rá an bhfuil cumas na Gaeilge ann nó nach bhfuil i dtreo is go dtuigfidh daoine go bhfuilimid ag dul sa treo cheart agus ní a mhalairt. An módh oibre fostaíochta is mó atá i gceist agam anseo. Nuair a thagann duine i gcomhair agallaimh, ba cheart a chumas oibre trí Ghaeilge a mheas. Ní dóigh liom go bhfuil sé sin i gcoinne aon riail.

See this speech in context