Mr. Tomás Ó Síocháin:

Ní léir dom go bhfuil aon chás tar éis teacht chomh fada linn go dtí seo. In aon chás ina mbeadh drochthionchar nó tionchar ar leith ag aon ní a bhaineann le cúrsaí fiontraíochta nó pleanála nó aon rud mar sin, déanann muid machnamh ar an gceist sin cás ar chás. Bunaithe ar an bplé a bhí ann Déardaoin seo caite, táim go láidir den tuairim go n-aithníonn na comhairlí áitiúla go bhfuil buntáistí ag baint le cur chuige caighdeánach. Nílim ag labhairt thar ceann na gcomhairlí áitiúla ach feictear dúinn go bhfuil siad oscailte do chur chuige caighdeánach. Bheadh sé sin ina thacaíocht do gach duine agus chuirfeadh sé le húsáid na Gaeilge ag deireadh thiar thall.