Aengus Ó Snodaigh (Dublin South Central, Sinn Fein)
Link to this: Individually | In context | Oireachtas source

Mar a rinne muid le gnéithe eile a bhfuil muid tar éis díriú isteach orthu, cuirfidh muid tuairisc le chéile - tá sé tosaithe cheana - agus déanfaidh muid an tuairisc sin a chur faoi bhráid an Aire. Anois is arís, tagann Aire os ár gcomhair nuair atá tuairisc foilsithe againn. Tá súil againn, roimh dheireadh na míosa seo, go mbeidh an tAire, an Teachta Catherine Martin, os ár gcomhair maidir le tuairisc a chuir muid le chéile faoi cheist na foilsitheoireachta. Déanfaidh muid an rud céanna sa chás seo. Beidh moltaí againn agus déanfaidh muid iarracht iad a bhrú chun cinn. Tá ceisteanna ag gach uile duine anseo. Bhí mé ag glacadh nótaí agus na finnéithe ag caint chun ceisteanna a chur ar an Aire nuair a bheidh an deis agam sa Dáil. Cuirfidh mé ceist uirthi cén fáth nach bhfuil rudaí áirithe déanta agus cén fáth nach bhfuil an t-athbhreithniú foilsithe go fóill. Is féidir liom rudaí mar sin a dhéanamh chun cuidiú leis na finnéithe brú ar aghaidh.

Tá gach duine anseo ó pháirtithe difriúla. Tá toghchán ag teacht. Glacaim leis go bhfuil daoine ag éisteacht le cad atá á rá ag na finnéithe agus go mbeidh na Gaeilgeoirí laistigh de na páirtithe ag déanamh stocaireachta laistigh dá bpáirtithe féin ionas go mbeidh cur chuige níos fearr ann. Is í an cheist is práinní a thóg mé as seo go dtí seo, seachas an cheist tithíochta atá muid tar éis dul tríd sin agus tá muid fós ag fanacht leis na treoirlínte, ná deireadh a chur leis an éiginnteacht atá i gceist maidir leis seo ionas go mbeidh a fhios ag na finnéithe go leanfaidh an córas seo. Glacaim leis go leanfaidh sé ach níl sé sin cinntithe.

Is féidir linn ceist a chur ar an Aire chomh maith. Labhróidh mé leis an gcléireach chun nóta a chur le chéile maidir leis an bpróiseas athbhreithnithe le fáil amach cad iad go díreach na téarmaí tagartha a bhí i gceist. Cuirfidh mé ansin ceisteanna ar an Aire maidir le cad atá i gceist leis sin. Brú breise is ea é, b’fhéidir. Is í sin an chumhacht atá againn. Nuair atá tuairisc foilsithe againn, tá deis againn é a chur faoi bhráid na Dála agus díospóireacht a bheith sa Dáil uirthi. Ní fhaigheann muid an deis sin go minic. Cuirtear isteach i lotto é agus uaireanta bíonn díospóireacht mar thoradh air sin. Déanfaidh muid amhlaidh leis seo.