Oireachtas Joint and Select Committees

Wednesday, 17 May 2023

Joint Committee on the Irish Language, the Gaeltacht and the Irish Speaking Community

Ceannteidil an Bhille um Údarás na Gaeltachta (Leasú), 2022: Grinnscrúdú Réamhreachtach (Atógáil)

Photo of Éamon Ó CuívÉamon Ó Cuív (Galway West, Fianna Fail)
Link to this: Individually | In context | Oireachtas source

Tá contúirtí de chuile shórt sa saol. Is cuimhin liom, nuair a toghadh mé mar Aire na Gaeltachta, gur tugadh na hoileáin Ghaeltachta agus na hoileáin ghalltachta isteach in aon áit amháin don chéad uair. Bhí faitíos ar na daoine ó na hoileáin gan Ghaeilge go bhfágfaí ar an méar fhada iad, go mór mór nuair a bhí na trí oileán is mó sa tír i mo Dháilcheantar féin, ach déarfainn go ndéarfaidís nach raibh rudaí riamh chomh maith is a bhí nuair a bhí mé i réim, fiú thíos i mBaile Chaisleáin Bhéarra agus an tOileán Mór, mar go raibh sé mar pholasaí agam go raibh chuile cheann de na hoileáin tábhachtach, fiú oileán le deichniúr. Thriail mé an rud céanna a dhéanamh ó thaobh na Gaeltachta agus deontais Ghaeltachta. Bhí na deontais spóirt agus chuile shórt eile le fáil sna ceantair Ghaeltachta. Bhí top-ups le fáil faoin scéim ceantair laga ardriachtanais, CLÁR, do cheantair ina raibh an daonra an-lag agus mar sin de. Braitheann sé ar na pearsana. Ní bhraitheann sé ar cá bhfuil siad. Is é sin a chreidimse. Ní féidir reachtaíocht a dhéanamh a chlúdódh chuile fhéidearthacht, ach má tá bord láidir réigiúnach ann b'fhéidir go mbeadh bunús le ceantair phleanála teanga a úsáid leis sin. Caithfimid coinneáil ag smaoineamh, ag argóint agus ag plé go dtí go dtiocfaimid ar réiteach mar tá fadhb ann nach bhfuil éasca le réiteach. Tuigim an rud atá i gceist ag na finnéithe. Is an-lá a théim go hUíbh Ráthach. Tá aithne agam ar dhaoine ó Uíbh Ráthach.