Dr. Aodh?n Mac Cormaic:

Is ionann an chéad rud a bheidh le rá agam faoi sin ná go gcaithfear don phlean a bheith fíorthábhachtach mar gheall ar an áit ina bhfuilimid faoi láthair. Tabharfaidh sé bunlíne dúinn faoin saghas agus leibhéal earcaíochta ar an gcéad dul síos a gcaithfimid dul i ngleic leis. Níl na figiúirí sin maidir leis an leibhéal earcaíochta ar fáil in aon áit amháin faoi láthair. Tabharfaidh sé sin bunlíne dúinn faoin dúshlán is mó atá le baint amach, atá ann amach romhainn agus atá le sárú roimh 2030.

Chomh maith leis sin beidh sé ag aithint na háiteanna ina bhfuil oifigí lonnaithe sa Ghaeltacht agus na folúntais a bheidh ann amach anseo le líonadh, agus straitéisí a leagan amach le haghaidh iad sin a líonadh. Caithfimid breathnú as an nua ar an rud seo agus breathnú go nuálach ar bhealaí le haghaidh daoine leis an teanga a earcú. Go dtí seo agus faoi láthair, feictear go bhfuil na huimhreacha maidir le líon na ndaoine atá ag cur isteach ar fholúntais le Gaeilge an-bheag. Caithfimid an fheasacht sin ar an méid post a bheidh ann a ardú.

I dtús báire, caithfimid a leagan amach an áit ina bhfuil na poist, na hoifigí istigh sa Ghaeltacht a mbeidh na poist sin le líonadh iontu, agus ansin go mbeidh moltaí déanta maidir le dátaí chun go mbeidh na hoifigí sin ag feidhmiú go huile is go hiomlán trí mheán na Gaeilge.

Níl sé sin teoranta, ach an oiread, do na hoifigí atá lonnaithe sa Ghaeltacht. Táimid ag caint faoi sheirbhísí a chuirtear ar fáil taobh amuigh den Ghaeltacht trí línte cabhracha a chuirtear ar fáil istigh sa Ghaeltacht do phobal na Gaeltachta. Beimid ag iarraidh a fháil amach faoi na seirbhísí sin a chuirtear ar fáil ón taobh amuigh do phobal na Gaeltachta agus na beartais earcaíochta a chaithfear a chur i bhfeidhm le haghaidh seirbhísí Gaeilge a chur ar fáil mar chuid de na seirbhísí sin.

Chun achoimre a dhéanamh ar an rud, b'fhéidir go bhfuil duine de mo chomhghleacaithe ag iarraidh teacht isteach agus labhairt.