Aindrias Moynihan (Cork North West, Fianna Fail) | Oireachtas source

Gabhaim buíochas leis na finnéithe as na cuir i láthair éagsúla.

Tuigim an tslí a mbraitheadh pobal nuair nach bhfuil ionadaíocht acu. Táim á rá sin mar dhuine ó cheantar Mhúscraí, áit nach raibh agus nach bhfuil ionadaíocht againn faoi láthair faoin gcóras reatha. Fiú leis an seanchóras a bhí ann, nuair a bhí ceantar Chúige Mumhan mar thoghcheantar bhí sé an-deacair ar phobal aon duine a thoghadh ón Rinn, ó cheantar Mhúscraí, Cléire agus go leor leor eile. Tá sé soiléir go mbraitheadh pobal an t-easnamh sin gan ionadaíocht. Is dul chun cinn go mbeidh deis anois daoine a roghnú go háitiúil. Luaigh na finnéithe figiúir thart ar 1,700 duine mar dhaonra. Dá mba rud é go rabhamar ag glacadh leis sin mar thairseach agus go mbeadh ar a laghad duine ag gach pobal leis an méid sin daonra acu, cén éifeacht a bheadh aige sin ar phobail níos mó? An mbeadh seisear, seachtar nó ochtar d’ionadaithe ar an mbord ó Chúige Chonnacht, Cúige Uladh agus mar sin de? Nílim cinnte an bhfuil na finnéithe tar éis féachaint ar na figiúirí sin.

Tá sé soiléir go bhfuil an-chuid dul chun cinn á dhéanamh ag an bhfoireann agus ag an tascfhórsa chun daoine a mhealladh agus a ghríosú chun Gaelainn a thabhairt chun cinn. Tá an tascfhórsa seo neamhspleách ar an bplean teanga. An bhfuilid ag obair as lámha a chéile? Cén tacaíocht bhreise a d’fhéadfadh an t-údarás tabhairt ansin?

Rinneadh tagairt do thithíocht. Tá sé seo pléite againn le han-chuid de na finnéithe a tháinig os ár gcomhair agus dúradh gur chóir go mbeadh leathnú ar chumhachtaí an údaráis. Conas ar chóir don údarás tithíocht a láimhseáil i gceantair na bhfinnéithe chun tacaíocht a thabhairt dóibh?