Ms F?ona de Buis:

Dá mbeadh freagracht ag an údarás ag baint le cúrsaí tithíochta, chabhródh sé an-chuid. Ní fheadar an bhfuil cur amach ag an gcoiste ar Chomhairle nan Eilean Siar in Albain. Tá Comhairle nan Eilean Siar mar a bheadh an t-údarás anseo agus tá an-bhaint acu siúd le cúrsaí tithíochta. Tá siad chomh páirteach le dreamanna pobail agus le hiontaobhais tithíochta. Mar shampla, tá áit ó thuaidh ar an Eilean Sgitheanach, the Isle of Skye, a bhfuil daonra an-íseal ann. Is áit í a bhfuil tithe saoire ann, mar atá sna Gaeltachtaí ar fad anseo. Is áit í go bhfuil daoine ag imeacht aisti agus nach bhfuil fostaíocht ann, mar atá anseo agus mar atá in Uíbh Ráthach. An rud a rinneadh ansin ná, i gcomhar le Comhairle nan Eilean Siar, leis na húdaráis eile áitiúla, leis an gcomhairle contae áitiúil agus le dream pobail sa cheantar, thógadar tithe. Thógadar tithe go bhféadfadh daoine ceannach ar phraghas réasúnta. An eochair don rud ar fad ná go raibh an talamh ann. Dá mbeadh an chumhacht ag an údarás talamh a cheannach agus a chur ar fáil chun tithe ar phraghas réasúnta a thógáil, chabhródh sé sin an-mhór, ní hamháin dúinne ach do na Gaeltachtaí ar fad. Tá méid áirid tithe tógtha ar an Eilean Sgitheanach. Tá ionad leighis tógtha don NHS agus tá ionad beag tógtha le haghaidh dream atá ag plé le cúrsaí iascaireachta. Tá siad ag cruthú fostaíochta ach níos mó ná aon rud eile, tá siad ag tabhairt deis do dhaoine cónaí ina n-áit féin. Sin an sórt rud atá uainn agus is dóigh liom gur fiú féachaint air sin mar eiseamláir.