Pa Daly (Kerry, Sinn Fein) | Oireachtas source

Bhí mé ar an gcomhchoiste ar feadh dhá bhliain nó mar sin. Bhíomar i mBéal Feirste agus sa Tuaisceart. Táimid in ann a fheiceáil go bhfuil an Ghaelainn beo ar fud na tíre, go mór mór leis na Gaelcholáistí. I dTrá Lí Chiarraí, tá Gaelcholáiste nua tar éis oscailt. Is lá an-tábhachtach é don Ghaelainn, ach tá géarchéim i ngach ceann de na Gaeltachtaí maidir le laghdú ar na daoine atá ag caint. Ba chóir go mbeadh gach aon chabhrú tugtha do na ceantair sin chun an Ghaelainn a chaomhnú in Uíbh Ráthach agus i gCiarraí agus i gCorca Dhuibhne chomh maith. Is é an plean atá ag an Rialtas ná na suíocháin a bhí againn i gCiarraí a laghdú. Is céim chun cúl é sin. Tá plean mar gheall ar cheapacháin an Aire a dhúbailt. Tá 10% de dhaonra na Gaeltachta i gContae Chiarraí ach ní bheidh ach 6% de na suíocháin againn. Níl sé sin daonlathach. Tá an éagóir soiléir do gach éinne in Uíbh Ráthach. Gabhaim mo bhuíochas le Victor Bayda agus gach éinne a bhí ag obair leis an bplean teanga. Ba chóir go mbeadh trí shuíochán i gCiarraí, is é sin, dhá shuíochán i gCorca Dhuibhne agus ceann eile in Uíbh Ráthach chun cabhrú leo san obair atá á déanamh acu. Táimid ag iarraidh gach aon tacaíocht a thabhairt dóibh.