Catherine Martin (Dublin Rathdown, Green Party) | Oireachtas source

Ar dtús, tabharfaidh mé eolas faoi Cúla4. Tuigim go bhfuil Cúla4 faoi réir le seoladh i mí Mheán Fómhair. In éineacht leis an gcoiste, táim ag súil leis an tseirbhís nua seo do dhaoine óga. Bhí seoladh Cúla4 mar chuid thábhachtach den tiomantas a leagadh amach i straitéis iar-Covid TG4 chun tacú le breis rannpháirtíochta le lucht féachana níos óige agus ábhar a chur ar fáil dóibh. Tarraingíonn na tuarascálacha a thug Údarás Craolacháin na hÉireann agus mo Roinn chun críche aird ar thogra Cúla4, ag rá go gcruthóidh an tseirbhís nua luach don phobal agus go dtabharfaí aghaidh ar réimse tábhachtach de chraoltóireacht seirbhísí pobal. Leagfar béim air sna tuarascálacha go mbeidh tionchar dearfach ag Cúla4 mar go gcuirfidh sé tuilleadh ábhar Gaeilge ar fáil do lucht féachana níos óige. Baintear úsáid cheana féin as ábhar TG4 i go leor scoileanna ar fud na tíre agus cuirfidh an tseirbhís nua leis an acmhainn thábhachtach oideachais seo. Féachann mo pháistí féin ar TG4 nuair atá siad ar scoil agus tá mé ag súil go mór mar thuismitheoir go mbeidh siad ag féachaint ar Cúla4. Tá áthas orm go mbeidh sé sin ar fáil do dhaltaí sna scoileanna ó Mheán Fómhair.

Cé gur tagraíodh sa tuarascáil do lucht féachana sách beag a mheallfaidh an tseirbhís nua, bheifí ag súil leis an toradh sin agus aghaidh á thabhairt ar riachtanais chainteoirí Gaeilge. Ní thugann figiúirí féachana léargas ar an lucht féachana iomlán ná ar an luach atá ag an bpobal ar an gcainéal, i bhfianaise na húsáide a bhaintear go forleathan as an ábhar sin i scoileanna. I bhfianaise stádas TG4 mar fhoilsitheoir-craoltóir, beidh sé mar thoradh ar an tseirbhís nua go ndéanfar tuilleadh infheistíochta in earnáil an léiriúcháin Ghaeilge.

Maidir le seirbhís raidió do dhaoine óga a chur ar fáil, tá sé ar an taifead gur mhaith liom, más féidir, an cineál seo seirbhíse a fheiceáil i bhfeidhm do dhaoine óga. Tá Coimisiún na Meán mar an rialtóir craolacháin neamhspleách anois atá freagrach as seirbhísí craolacháin raidió neamhspleácha a cheadú in Éirinn. Is é Coimisiún na Meán, agus ní mise mar Aire, a thionscnaíonn an próiseas ceadúnaithe do sheirbhísí raidió. Faoi láthair, tá 22 seirbhís phobail, phobal-leasaithe nó shainspéise ar an aer. Mar a leagtar amach sa reachtaíocht, tá próiseas foirmiúil reachtúil rialála againn maidir le seirbhís nua a thabhairt isteach a dhéanann an rialtóir neamhspleách, Coimisiún na Meán. Ní mór dó go leor gnéithe a chur san áireamh, lena n-áirítear na himpleachtaí a bhaineann cúnamh Stáit. Ní mór dó a chur san áireamh freisin an leibhéal de bhandaleithead FM atá fágtha sa tír. Mar a dúirt mé, ba mhaith liom, más féidir, an cineál seo seirbhíse a fheiceáil i bhfeidhm do dhaoine óga.