Aindrias Moynihan (Cork North West, Fianna Fail) | Oireachtas source

Táim buíoch as an gcur i láthair agus an t-eolas ann agus, gan dabht, as an airgead breise atá á chur ar fáil agus an dul chun cinn. Táim chun díriú ar ábhar amháin nó dhó mar gheall ar na meáin. Luaigh an tAire “An Cailín Ciúin” níos luaithe. Sampla maith é an scannán sin a léiríonn an tslí go bhfuil an Ghaelainn á cur os comhair slua níos mó, daoine níos forleithne agus teicneolaíocht dhifriúil á úsáid an t-am ar fad. Ní aon rud nua an scannánaíocht ach tá ardáin dhifriúla á n-úsáid an t-am ar fad. Tá éileamh ann i gcónaí. Tá an-chuid de na cainéil raidió agus theilifíse ag bogadh ar líne agus tá éileamh ann i gcomhair na hardáin sin a chur in úsáid. Tá éileamh ó ghrúpaí difriúla, in ainneoin an jab mhóir atá á dhéanamh ag Raidió na Gaeltachta agus TG4, mar shampla, thar na blianta. Tá an-chuid déanta acu. Tá éileamh i gcomhair cainéil do dhaoine óga. Ní fheadar an bhfuil aon dul chun cinn déanta chun seirbhís raidió a chur ar fáil i gcomhair dhaoine óga. Bhí plé faoi Cúla4 a bhrú ar aghaidh chomh maith. An bhfuil aon dul chun cinn maidir leis sin? Tá sé an-tábhachtach go mbeadh na hardáin go léir go bhféadfaí úsáid beo agus in úsáid chun an Ghaelainn a chur os comhair an méid daoine gur féidir leo. Tá éileamh maith ar theilifís, raidió agus go leor eile ar na hardáin éagsúla. Tá sé sin pléite againn anseo ag cruinnithe éagsúla. An bhfuil aon dul chun cinn ansin? An féidir a léiriú cad atá á dhéanamh chun úsáid a bhaint as na hardáin éagsúla agus chun go mbeadh an deis sin ag daoine óga?