Ms Bl?thnaid N? Ghr?ach?in:

Tá mé chun filleadh ar an bpointe maidir leis na tástálacha caighdeánacha don Ghaeilge i scoileanna T2. D’fhéadfadh an comhchoiste breathnú ar an gceist sin arís agus brú a chur ar an Roinn. Is ceist ollmhór atá ann do stádas na Gaeilge agus an luach atá ar an teanga. Tá bunús na faidhbe sa cheist sin mar níl meicníocht ann ar chor ar bith le fáil amach cén caighdeán nó cén cumas atá ag na daltaí. Mar a luaigh Mícheál S Mac Donnacha, níl aon iachall nó dualgas ar scoileanna na tástálacha seo a dhéanamh, rud a chiallaíonn nach bhfuil tuismitheoirí ar an eolas faoi conas mar atá ag éirí leis an bpáiste nó an bhfuil straitéisí, idirghabháil, nó tacaíocht de dhíth. Táimid ag ligean don chóras teip a dhéanamh ar na deiseanna foghlama atá ag na daltaí sin. Tá an cheist seo ollmhór agus táimid tar éis ligean dó sin sleamhnú isteach sna scoileanna. Deirtear go bhfuil laghdú i líon na ndíolúintí atá bronnta sna bunscoileanna. B'fhéidir go bhfuil níos lú scoileanna T2 anois i mbun na dtástálacha agus nach bhfuil an fhadhb nó an dúshlán chomh soiléir agus nach bhfuil siad ag lorg díolúintí mar gheall air sin, má thuigtear an pointe.