Aengus Ó Snodaigh (Dublin South Central, Sinn Fein) | Oireachtas source

Tuigim. Tá súil agam go mbeidh deis againn roinnt de na ceisteanna atá ardaithe anseo againne agus ag na finnéithe a chur roimh na dreamanna eile a thiocfaidh os comhair an choiste idir seo agus deireadh mhí na Samhna, agus go bhfaighimid roinnt freagraí ó chumann na bpríomhoidí, ón Roinn, srl. Tá sraith de chúig cruinniú leagtha síos ag an staid seo agus is féidir cur leis sin más gá ach tógfar cruinnithe eile san athbhliain. Ba mhian liom cloí leis an gcúig chruinniú agus tuarascáil a chur faoi bhráid na Dála chomh tapa agus is féidir. B’fhéidir go mbeidh muid in ann athrú poirt a fháil ón Roinn nó ón Aire féin fiú mar gheall ar a bhfuil glactha go dtí seo nó aon cheist eile maidir leis an nGaeilge.

Cuirim críoch leis an gcruinniú. Gabhaim buíochas le Caoimhín Ó hEaghra, thar ceann an Fhoras Pátrúnachta; Julian de Spáinn, Paula Melvin agus Róisín Ní Chinnéide - déanaim comhghairdeas le Róisín arís as an obair atá roimpi; "No pressure" mar a deirtear - thar ceann Chonradh na Gaeilge; agus Bláthnaid Ní Ghréacháin agus Micheál S Mac Donnacha thar ceann Ghaeloideachas.

Tá an cruinniú curtha ar athló go dtí 1.30 p.m. ar an 5 Deireadh Fómhair, nuair a bheidh an t-ábhar céanna á phlé againn le ceardchumainn na múinteoirí. Beifear in ann an cruinniú sin a fheiceáil beo nó ar an player.