Éamon Ó Cuív (Galway West, Fianna Fail) | Oireachtas source

Chuir mé spéis sa mhéid a bhí le rá ag na finnéithe maidir leis an nGarda. Tá a fhios agam go bhfuil gardaí le taithí as Conamara ag iarraidh filleadh ar Chonamara agus níl an ceannfort san áit ina bhfuil siad sásta scaoileadh leo. Thiocfainn leis na finnéithe go bhfuil sé in am do Choimisinéir An Gharda Síochána ordú a thabhairt go mbeadh deis acu bogadh siar.

Tagraím do T1 agus T2 san ardteistiméireacht. Cén bhuntáiste a theastódh? Tá sé díchéillí go ndéanfaí páipéar níos deacra agus go bhfaighfí na marcanna céanna. Níl aon chiall leis sin agus éinne a cheap é sin ní raibh mórán ciall acu. Cén bhuntáiste a chaitheadh a bheith ann le go mb'fhiú cúrsa níos deacra a dhéanamh? Moladh amháin a bhí ann ná go mbeadh dhá chúrsa Gaeilge ann, cúrsa teanga na Gaeilge agus cúrsa litríochta na Gaeilge agus go bhfaigheadh duine dhá oiread marcanna air sin. An mbeadh sé sin go maith?

Thiocfainn go mór leis na finnéithe go dteastaíonn áit sna cathracha. Tá sé difriúil i gConamara mar is Gaeilge a labhraíonn muid eadrainn féin ach istigh sna cathracha tá lárionad do Ghaeilge ag teastáil gan amhras.

Bhí caint ar cheann a thógáil thart ar lár chathair Bhaile Átha Cliath, áit a mbeadh an Luas agus mar sin de ar fáil. An gcuideodh sé sin go mór le daoine óga Gaeilge a labhairt eatarthu dá mbeadh lárionad mór go dtiocfadh Gaeilgeoirí as gach uile áit sa chathair le chéile le haithne a chur ar a chéile. Má bhíonn na daltaí ag iarraidh an nuacht a fháil, an mbreathnaíonn siad ar an teilifís? An éisteann siad le raidió nó an mbreathnaíonn siad ar an bhfón?