Ms Elly Shaw:

Bheadh sé go deas a cheapadh go bhféadfadh muid a lán rudaí a dhéanamh. Bheadh sé go hiontach dá mbeadh áit cosúil leis an gcultúrlann againn i mBaile Átha Cliath go bhféadadh muid irisí agus leabhair a dhíol ann. Tá áiteanna cosúil leis an gcultúrlann, An Siopa Leabhar agus na hionaid Gaeilge an-tábhachtach ó thaobh díol na n-irisí de mar is ansin a dhíoltar méid mór cóipeanna i gcomparáid le siopaí eile. Dá mbeadh níos mó acu ann, táim cinnte go mbeadh muid in ann níos mó irisí a dhíol.

Tá a lán rudaí eile a bheadh tábhachtach freisin. Bheadh sé iontach dá mbeadh na hionaid seo againn, ach anuas ar sin bheadh gá le poiblíocht a dhéanamh ar na hábhair iad féin mar a dhéantar i gcás na hirisí agus leabhair Béarla an t-am ar fad. Tá an cheist chomh mór sin go bhfuil sé deacair í a fhreagairt. Maidir leis na féilte, is aisteach a rud é gur luaigh an Seanadóir an Fhéile Leabhar Baile Átha Cliath. Bhí ócáid ag LeabhairCOMHAR le cúpla bliain anuas ag seoladh leabhair mar chuid de Fhéile Leabhar Baile Átha Cliath. Ní dóigh liom go raibh mórán ócáidí Gaeilge ann. Bhí cúpla ceann ach ní raibh an méid ollmhór. Thug mé faoi deara nach raibh béim á leagan orthu sa bhealach céanna is a bhí ar na hócáidí eile.