Mr. Micheál Ó Conghaile:

Bheadh an-suim ann mar feictear daoine go minic agus deir siad nach raibh a fhios acu go raibh leabhar áirithe ar fáil. Tagann daoine chugainn agus b'fhéidir go mbeadh an leabhar foilsithe cúig bliana, nach mbeadh a fhios ag daoine áirithe faoi. Téann daoine isteach i siopa leabhair le leabhar faoi leith a cheannach ach b’fhéidir go dtiocfaidh siad amach le dhá leabhar eile freisin. Is é sin an fáth go gcaithfear na leabhair a bheith ar na seilfeanna sna siopaí. Má tá 2,000 nó 3,000 leabhar i gcló, cén fáth ar a laghad nach mbeadh siopa leabhar sásta 100 leabhar a thaispeáint? I go leor de na siopaí a bhfuil seilf nó dhó leabhair Ghaeilge iontu, is foclóirí atá ann nó leabhair a bhaineann le múineadh na Gaeilge. Tá éileamh mór ar leabhair a bhaineann le múineadh na Gaeilge, leabhair ghramadaí, foclóirí agus mar sin de, ach táimid ag caint ar na gnáthleabhair ar nós filíochta, úrscéalta agus mar sin de. Tá an fheiceálacht tábhachtach. Tagann daoine chugainn agus iad ina n-iontas gur leabhar é atá foilsithe le cúig bliana nár chuala siad faoi nó nach bhfaca siad faoi.