Aengus Ó Snodaigh (Dublin South Central, Sinn Fein) | Oireachtas source

Tá cúpla ceist agam féin agus ansin is féidir leis na comhairlí a bhfreagraí a thabhairt ar an méid a dúirt an Teachta McHugh chomh maith ar mo cheisteanna. Bhí an cruinniú seo an-spéisiúil. Tá sé scanrúil ar shlí amháin nach bhfuil coinníollacha teanga i gceist ó thaobh na tithíochta de i roinnt de na comhairlí contae - chuala muid uathu inniu – agus ó thaobh na forbartha de.

Tá dhá cheist agam agus tá súil agam go mbeidh na comhairlí in ann iad a fhreagairt. Tá siad sách simplí. An bhfuil siad ar an eolas faoin méid a tharla san Ard-Chúirt le déanaí maidir leis an bplean tithíochta, óstán i Ráth Chairn, agus an méid a dúirt an breitheamh? Tá sé tábhachtach do gach comhairle contae ina bhfuil ceantar Gaeltachta ó thaobh na pleanála de. Tá siad tar éis a lua go bhfuil plean forbartha á chur le chéile. Tá dréachtphlean acu faoi láthair. Ba chóir go mbeadh an méid a bhí le rá ag an mbreitheamh sa phlean sin agus pé monatóireacht agus a leithéidí a théann leis. Ba chóir go mbeadh na scéimeanna teanga domhain agus daingean.

Níl a fhios agam an bhfuil na comhairlí ar an eolas ach luaigh an tAire tithíochta go mbeidh scéim phleanála teanga agus scéim ó thaobh tithíochta de ag teacht chun cinn roimh an Nollaig. Tá an tAire le bheith os comhair an choiste seo chun é sin a phlé mar chuid den tsraith chruinnithe á eagrú againn faoi thithíocht sa Ghaeltacht. Pé rud a déarfaidh an tAire sa scéim phleanála tithíochta sa Ghaeltacht, b’fhéidir go mbeidh sé le feiscint sa phlean forbartha chomh maith. Nílim cinnte an é Tír Chonaill a bhí le críochnú roimh an Nollaig. Tá súil agam go bhfuil am fós ann ionas go mbeidh sé sna pleananna forbartha do 2022 ar aghaidh.