Mr. Pádraig Ó Beaglaoich:

Ní rachaidh mé i bhfad scéal leis. Tacaím leis an méid a dúradh roimhe seo. Ar ndóigh, táimid ag plé ceist shonraíochtaí T1 agus T2 agus ceist na Gaeilge, ach táimid anseo freisin chun an t-oideachas trí mheán na Gaeilge a phlé.

I gcomhthéacs na leasuithe atá tugtha don tsraith shinsearach, bheadh sé fíorthábhachtach go mbeadh na deiseanna céanna ag scoileanna lán-Ghaeilge agus scoileanna Ghaeltachta maidir le hacmhainní agus múinteoirí agus maidir le rogha ábhair. Tá céimeanna chun tosaigh glactha. Luaigh Fíona Uí Uiginn an polasaí don oideachas Gaeltachta. Maidir le bunscoileanna, tá an fhoghlaim ar líne. Rinneadh tagairt dó sa The Irish Timesar maidin. Cuireadh cúrsa fisiceach ar leibhéal na hardteiste ar fáil go fíriúil. Fáiltíonn COGG roimhe go bhfuil fógra déanta go mbeidh an dara hábhar le cur i bhfeidhm mar chuid den bhunscoil. Bheimis ag moladh freisin go leathnófaí é sin amach. Baineann é seo leis an gceist chun é a leathnú amach ar bhonn níos fairsinge. Baineann sé leis an bpolasaí don oideachas Gaeltachta, ach tá deacrachtaí soláthair ann do na Gaelcholáistí chomh maith maidir le múinteoir a aimsiú i gcuid den na sain-ábhair. Bíonn sé seo i gceist go minic ar leibhéal na hardteiste.

Molaimid go leathnófaí múnla na bunscoile nó scéim na bunscoile amach go dtí na Gaelcholáistí chomh maith agus nach mbeadh sé teoranta. Tá sé fíorthábhachtach go mbeadh sé sin ar fáil do na scoileanna Gaeltachta. Dá bhféadfaí teacht ar mheicníocht agus ar bhealach chun é a leathnú amach go dtí na Gaelcholáistí, táim cinnte go bhfáilteofaí roimhe sin. B’fhéidir go bhfreastalódh sé ar cheist soláthair múinteoirí. Níl mé ag rá go bhfreagróidh sé na ceisteanna ar fad a bhaineann le soláthar múinteoirí, ach maolódh sé cuid den fhadhb a bhaineann le cuid de na hábhair. Tá Gaelcholáistí ann, a bhféadfadh Caoimhín Ó hEaghra labhairt fúthu, ar mhaith leo a bheith ag déanamh níos mó freastal maidir le hábhair ardteiste agus nach féidir leo.