Ms Aoife Ní Ghloinn:

Mar a mhínigh Siuán, is dóigh liom gurb é leibhéal B2 an leibhéal is mó a luaitear ar fud an domhain go hidirnáisiúnta. Ba é an moladh a bhí ag an Dr. John Walsh nuair a bhí sé os comhair an choiste ná gurb é B2 an leibhéal is mó a theastódh le go mbeadh duine in ann feidhmiú san ionad oibre agus déileáil le rudaí nach mbeadh aon choinne acu leo agus an cineál sin rud. Is é B2 an leibhéal is gnách a luann muid. Mar a dúirt an Cathaoirleach, bheadh comhthéacsanna ann sa mhéid is nach mbeadh daoine ag déileáil leis an bpobal. D’fhéadfaidís a bheith ag glacadh sonraí síos agus ag déanamh rudaí meicniúla, agus rudaí a bheadh intuartha. Is é sin an difríocht is mó idir B1 agus B2. Dá mbeadh daoine ag déileáil le réimse teoranta tascanna agus rudaí intuartha i gcónaí, b’fhéidir gur leor leibhéal B1 sa chomhthéacs sin.

Tá sé tábhachtach idirdhealú a dhéanamh idir na scileanna éagsúla. B'fhéidir nach mbeadh caighdeán an-ard scríbhneoireachta ag teastáil ó an-chuid daoine a bheadh ag plé leis an bpobal, ach bheadh leibhéal B2 de dhíth orthu sa chaint. Shamhlóinn go mb’fhéidir go mbeidh B2 sa chaint ag teastáil in an-chuid comhthéacs. Tá sé tábhachtach, seachas na lipéid “B1” nó “B2” a úsáid, go mbeadh muid ag caint faoi phróifílí cumais. Is é sin le rá go mbeadh leibhéal B2 sa chaint ag teastáil ó dhuine i ról faoi leith, nó leibhéal B1 sa scríbhneoireacht nó sa léitheoireacht i gcomhthéacsanna eile b’fhéidir. Is gá anailís a dhéanamh ar na riachtanais a bhaineann leis na poist éagsúla. Tá sé beartaithe ag an Roinn píosa taighde a choimisiúnú le breathnú ar an gceist seo. Bheadh sé tábhachtach go mbeadh an anailís ar na riachtanais a bhaineann le poist éagsúla lárnach sa taighde sin. I gCeanada agus sa Bhreatain Bheag, cuireadh uirlisí ar fáil agus tá taighde agus anailís déanta ar na riachtanais teanga a bhainfeadh le poist éagsúla mar chuid den earnáil phoiblí. Cuireadh uirlis ar fáil ar líne i gCeanada ar féidir le heagraíochtaí stáit ceisteanna a fhreagairt agus treoir a fháil maidir leis an bpróifíl cumais atá ag teastáil ó dhaoine a bheadh i róil faoi leith. Seo iad na cineálacha rudaí a bheidh ag teastáil: taighde agus uirlis nó treoir éigin a thacódh le heagraíochtaí Stáit an phróifíl chuí chumais a leagan síos do na poist éagsúla.

Ba mhaith liom filleadh ar an gcéad rud a luaigh an Cathaoirleach maidir le daoine a mhealladh. Buntáiste a bhaineann leis an moladh a rinne Fíona agus Áine ná go mbeadh cúrsaí na hardteistiméireachta agus na cúrsaí éagsúla ag leibhéil na meánscoile ceangailte leis an bhFráma Tagartha Comónta Eorpach. Ba cheart dom a shoiléiriú nach ionann an FTCE agus an TEG. Is é an FTCE an fráma idirnáisiúnta a bhfuil TEG, agus cúrsaí eile, bunaithe air. Is é an moladh atá déanta anseo ná go mbeadh cúrsa na hardteistiméireachta bunaithe air freisin. Dá ndéanfaí é sin, ar a laghad thuigfeadh mic léinn nó daltaí - má tá an cúrsa gnáthleibhéil, bonnleibhéal, ardleibhéil nó an sárleibhéal déanta acu - cén áit ar an scála ó A1 go C1 a mbeidís féin. Dá mbeadh a fhios acu gurb ionann a gcáilíocht ardteistiméireachta agus leibhéal B1 nó B2, b’fhéidir nach mbeadh drogall orthu cur isteach ar scrúdú TEG dá mbeadh gá leis mar chuid den phróiseas earcaíochta.