Oireachtas Joint and Select Committees
Tuesday, 2 February 2021
Select Committee on the Irish Language, the Gaeltacht and the Irish Speaking Community
Bille na dTeangacha Oifigiúla (Leasú), 2019: Céim an Choiste (Atógáil)
Joe McHugh (Donegal, Fine Gael) | Oireachtas source
Aontaím leis an Aire Stáit faoin tionchar thar na blianta a chuaigh thart maidir leis an bhfoireann aistriúcháin trasna an bhealaigh i dTeach Chill Dara. Tá sí níos láidre i gcomparáid le 2002. Ar an mbealach céanna leis an Teachta Ó Snodaigh, tháinig mé isteach in 2002 fosta, agus tá an tionchar suntasach le feiceáil. Mar shampla, trasna na Life san ionad comhdhála, tá comharthaí Gaeilge le feiceáil ar urlár na talún agus ar an gcéad, dara, tríú agus cúigiú hurlár. Tá na comharthaí le feiceáil agus ba mhaith liom aitheantas a ghabháil do na daoine atá ag obair i dTithe an Oireachtais as ucht an tsárobair atá déanta acu, an iarracht atá bainte amach thar na blianta agus a bheidh á dhéanamh san am atá romhainn. Tá sé sin le feiceáil. Cinnte táimid ag déanamh ár ndícheall ag obair agus ag iarraidh na rudaí a dhéanamh níos láidre, ach chomh maith leis sin tá sé le feiceáil anois sna comharthaí. Tá tionchar suntasach ag an obair atá bainte amach ag na daoine uilig atá ag obair go dian ar na comharthaí agus atá ag iarraidh don teanga a bheith níos láidre sa Teach agus taobh amuigh de, agus fá choinne an oibre atá á dhéanamh againne faoi láthair.
No comments