Dara Calleary (Mayo, Fianna Fail)
Link to this: Individually | In context

Tar éis phróisis chomhairliúcháin a rinneadh in 2014, aithníodh an 16 baile seo a leanas mar Bhailte Seirbhíse Gaeltachta faoi réir pleananna teanga a bheith comhaontaithe leis na pobail áitiúla i gcomhréir leis na critéir pleanála teanga faoi Acht na Gaeltachta 2012:

• Daingean Uí Chúis
• Leitir Ceanainn
• Cathair na Gaillimhe
• Cathair Chorcaí
• An Clochán Liath
• Trá Lí
• Dún Garbhán
• Baile Dhún na nGall
• Béal an Mhuirthead
• Caisleán an Bharraigh
• Baile an Róba
• An Clochán
• Cathair Saidhbhín
• Maigh Chromtha
• Baile Átha Buí
• An Uaimh

Tá Foras na Gaeilge freagrach as riar a dhéanamh ar an bPróiseas Pleanála Teanga lasmuigh den Ghaeltacht agus mar chuid de sin, tá 13 Baile Seirbhíse Gaeltachta (as an 16 ainmnithe) mar aon leis na Líonraí Gaeilge faoina scáth.

Go dáta, tá pleananna teanga faofa agus á gcur i bhfeidhm i gcúig Líonra Gaeilge (Inis, Baile Locha Riach agus Cluain Dolcáin sa dlínse ó dheas mar aon le dhá Líonra sa dlínse ó thuaidh- Iarthar Bhéal Feirste agus Carn Tóchair) agus i seacht mBaile Seirbhíse Gaeltachta (Leitir Ceanainn, Cathair na Gaillimhe, Caisleán an Bharraigh, Dún Garbhán, Cathair Saidhbhín, Trá Lí agus An Clochán).

Tá dréacht-phlean teanga Bhaile an Róba a mheas ag mo Roinn faoi láthair chomh maith.

Maidir leis na Bailte Seirbhíse Gaeltachta eile a bhfuil tús fós le cur leis an phróiseas pleanála teanga iontu, tá cead, faoi alt 9(2) d’Acht na Gaeltachta 2012, iarrtha ag Foras na Gaeilge ar mhaithe le tús a chur leis an phróiseas oifigiúil chun ceanneagraíocht a cheapadh sna bailte seo a leanas:

• An Uaimh

• Áth Buí

• Baile Dhún na nGall agus,

• Maigh Chromtha

Rachaidh Foras na Gaeilge i mbun an chéad chéim eile leis an gceithre Bhaile Seirbhíse Gaeltachta seo a luaithe is atá an cead sin tugtha ag mo Roinn.

Den trí Bhaile Seirbhíse Gaeltachta a thagann faoi chúram Údarás na Gaeltachta, is é Baile Seirbhíse Ghaeltachta Bhéal an Mhuirthead an t-aon bhaile nach bhfuil plean teanga i bhfeidhm go fóill ann. Tá tús curtha leis an obair le plean teanga a fhorbairt don bhaile seo, áfach.

Is fiú a nótáil chomh maith go bhfuil pleananna teanga ceadaithe agus á bhfeidhmiú i ngach uile ceann den 26 Limistéir Pleanála Teanga Gaeltachta atá aitheanta faoi Acht na Gaeltachta 2012.