Charlie McConalogue (Donegal, Fianna Fail)
Link to this: Individually | In context

Tá trí Bhaile Seirbhíse Gaeltachta sainaitheanta sa Ghaeltacht, sin iad:

• An Clochán Liath, Co. Dhún na nGall;
• Béal an Mhuirthead, Co. Mhaigh Eo;
• Daingean Uí Chúis, Co. Chiarraí.

Tá pleananna teanga á bhfeidhmiú i BSG An Clochán Liath agus BSG Daingean Uí Chúis.

An Chlochán Liath:

Ta plean teanga do BSG an Chlocháin Liath a chur i bhfeidhm ó 2022 i leith. Le hinfheistíocht de €300,000 go dtí seo agus an comhoibriú leanúnach atá ar fáil ó lucht gnó agus pobal an bhaile, tá dul chun cinn suntasach déanta ag an an cheanneagraíocht pleanála teanga (Forbairt na Rosann CTR) agus an Oifigeach Pleanála Teanga i spreagadh daoine chun an Ghaeilge a úsáid agus a chothú. Tá gnólachtaí áitiúla ag glacadh páirt ghníomhach, ag úsáid na Gaeilge ina gcuid cumarsáide agus seirbhísí, rud a chuireann le feiceálacht agus le húsáid na teanga agus glactar páirt i réimse leathan d’imeachtaí, ó fhéilte cultúrtha go himeachtaí pobail.

Béal an Mhuirthead:

Ar an 9 Meitheamh 2023, d’fhógair an tAire Stáit Patrick O Donovan, ar son na Roinne Turasóireachta, Cultúir, Ealaíon, Gaeltachta, Spóirt agus Meán, go mbeadh plean teanga le réiteach agus le cur i bhfeidhm don Bhaile Seirbhíse Gaeltachta, Bhéal an Mhuirthead, mar chuid den phróiseas pleanála teanga. Tá grúpa áitiúil, Pobal Feasta, tar éis comhairleoir pleanála teanga a fhostú le tacú leo plean teanga a ullmhú don BSG agus táthar ag súil go mbeidh an plean teanga ullamh chun faomhadh in Aire in 2026.

Daingean Uí Chúis:

Tá plean teanga do BSG Daingean Uí Chúis a chur i bhfeidhm ó 2022 i leith. Tá maoiniú de €424,000 íoctha go dtí seo leis an gceanneagraíocht pleanála teanga, Dúchas an Daingean chun plean teanga don bhaile a fheidhmiú. Tá an-dul chun cinn déanta go dtí seo agus an comhoibriú leanúnach á fháil ag an Oifigeach Pleanála Teanga ó lucht gnó agus ó phobal an bhaile. Tá an Ghaeilge níos feiceálaí ar an mbaile dá bharr agus spreagtar an pobal chun an Ghaeilge a úsáid agus a chothú ar go leor bealaí éagsúla.

Maidir leis an 13 Baile Seirbhíse Gaeltachta lasmuigh den Ghaeltacht atá faoi chúram Fhoras na Gaeilge, tá 7 gcinn i mbun fhorfheidhmiú pleananna teanga:

• Leitir Ceanainn;
• Caisleán an Bharraigh;
• Cathair na Gaillimhe;
• An Clochán;
• Trá Lí;
• Cathair Saidhbhín;
• Dún Garbhán.

Tá plean teanga amháin ullmhaithe agus curtha faoi bhráid na Roinne le faomhadh, sé sin Baile an Róba.

Tá beannacht iarrtha ag an bhForas le tús a chur le próiseas ceapacháin ceanneagraíochta i mBaile Átha Buí agus an Uaimh.

Tá obair ardaithe feasachta ar siúl leis an bpobal i mbaile Dhún na nGall agus Maigh Cromtha.

Maidir leis an bpróiseas pleanála teanga i gCathair Chorcaí, tá plé leanúnach ar bun i láthair na huaire ag súil is gur féidir an phleanáil teanga sa chathair a chur chun cinn.