Mairead Farrell (Galway West, Sinn Fein)
Link to this: Individually | In context | Oireachtas source

756. To ask the Minister for Health an féidir leis an t-eolas is déanaí a chur ar fáil faoin dul chun cinn atá á dhéanamh chun an post buan mar dhochtúir teaghlaigh ar an gCeathrú Rua a líonadh.; agus an ndéanfaidh sé ráiteas ina thaobh. [51477/22]

Stephen Donnelly (Wicklow, Fianna Fail)
Link to this: Individually | In context | Oireachtas source

Is cleachtóirí féinfhostaithe iad Dochtúirí Teaghlaigh agus dá bhrí sin is féidir leo cleachtais a bhunú in áit a roghnaíonn siad féin. Níl aon chóimheas forordaithe dochtúirí teaghlaigh le hothair agus ní rialaíonn an Stát líon na ndochtúirí teaghlaigh is féidir leo dul i mbun oibre i mbaile nó i bpobal.

Sa chás go gceaptar go bhfuil folúntas GP GMS le teacht chun cinn i gcleachtas, cuirtear FSS ar an eolas roimh ré agus bíonn baint ghníomhach aige leis an bpróiseas earcaíochta chun dochtúir teaghlaigh ionaid a aimsiú. Amhail an 1 Deireadh Fómhair, tá 25 folúntas ann ar fud na tíre, díreach faoi 1 faoin gcéad de líon iomlán na bpainéal GMS.

Tá sé curtha in iúl ag FSS gur fógraíodh an post GP GMS ar an gCeathrú Rua, a bhí folamh i mí na Nollag 2021, ceithre huaire ach níor éirigh leis. Tá seirbhís GP ionaid fós sa cheantar agus mar sin níor cuireadh isteach ar sheirbhísí d'othair. Leanfar d'iarrachtaí chun an post a líonadh tríd an Scéim GMS áfach.

Tá an Rialtas ar an eolas faoi shaincheisteanna an lucht saothair a bhfuil aghaidh á tabhairt orthu faoi láthair i gcleachtas ginearálta, lena n-áirítear rochtain theoranta ar sheirbhísí Dochtúirí Teaghlaigh i gceantair thuaithe áirithe, agus tá roinnt beart curtha i bhfeidhm aige chun earcaíocht agus coinneáil i gcleachtas ginearálta a fheabhsú.

Faoi Chomhaontú Dochtúirí Teaghlaigh 2019 tá méadú €206.6m tagtha ar chaiteachas bliantúil ar chleachtas ginearálta agus táthar ag súil leis go méadófar é go €211.6m in aghaidh na bliana an bhliain seo chugainn nuair a chuirfear an Comhaontú i bhfeidhm go hiomlán. Foráiltear leis an gComhaontú do mhéadú ar tháillí caipitíochta do dhochtúirí teaghlaigh, do sheirbhísí breise, do shocruithe teaghlaigh feabhsaithe chomh maith le ciste €2 milliún spriocdhírithe chun tacú le cleachtais i limistéir uirbeacha díothacha.

Tugadh isteach pacáiste tacaíochtaí feabhsaithe do chleachtais GP tuaithe roimhe seo chun tacú le Dochtúirí Teaghlaigh tuaithe; tá méadú 10% tagtha ar na tacaíochtaí sin faoi Chomhaontú Dochtúirí Teaghlaigh 2019. Ina theannta sin, meallann na cleachtais a fhaigheann tacaíochtaí cleachtais tuaithe na huasrátaí incheadaithe le haghaidh fóirdheontais tacaíochta foirne cleachtais agus ranníocaíochtaí ionaid le haghaidh saoire a thógáil.

Ina theannta sin, tá méadú leanúnach tagtha ar líon na ndochtúirí atá ag dul faoi oiliúint mar dhochtúirí teaghlaigh le blianta beaga anuas, ag ardú ó 120 in 2009 go 258 in 2022. Tar éis aistriú oiliúna Dochtúirí Teaghlaigh chuig an ICGP anuraidh, tá sé mar aidhm ag an ICGP 350 áit oiliúna a bheith ar fáil d'iontrálaithe nua gach bliain faoi 2026.

Tiocfaidh méadú ar líon na nDochtúirí Teaghlaigh atá ag obair sa Stát mar thoradh ar na bearta sin, rud a fheabhsóidh an rochtain ar sheirbhísí Dochtúirí Teaghlaigh d'othair ar fud na tíre.