Éamon Ó Cuív (Galway West, Fianna Fail)
Link to this: Individually | In context

Question 49: To ask the Aire Cumarsáide, Fuinnimh agus Acmhainní Nádúrtha céard iad na céimeanna atá sé ag glacadh lena chinntiú go gcomhlíonfaidh RTÉ a dhualgais dhlíthiúla i leith na Gaeilge; agus an bhfuil i gceist aige an reachtaíocht a láidriú sa chomhthéacs seo; agus an ndéanfaidh sé ráiteas ina thaobh. [15939/11]

Pat Rabbitte (Dublin South West, Labour)
Link to this: Individually | In context

Is craoltóir náisiúnta neamhspleách seirbhíse poiblí í RTÉ ar a bhfuil an sainchúram agus na dualgais a léirítear san Acht Craolacháin 2009.

Léiríonn Alt 114 den Acht na príomh cuspóirí ag RTÉ, ina measc an ceanglas go soláthraí sí réimse cuimsitheach clár san dá theanga, Gaeilge agus Béarla, a léiríonn éagsúlacht chultúrtha oileán na hÉireann ina iomláine.

Leagtar ar RTÉ ag Alt 102 den Acht go bhfoilsí sí Ráiteas Bliantúil i dtaobh Gealltanas Feidhmíochta ar aon dul lena cuid cuspóirí agus na gníomhaíochtaí a bheadh i gceist ag RTÉ gealltanas a thabhairt ina dtaobh san mbliain airgeadais úd san áireamh ann. Leagtar ar RTÉ sa bhreis ar sin ag an Acht go ndéana Údarás Craolacháin na hÉireann athbhreithniú ar RTÉ ar bhonn an Ráitis i dtaobh an Ghealltanais Feidhmíochta arna fhoilsiú aici. Le déanaí fuair mé an Ráiteas i dtaobh Gealltanas Feidhmíochta de chuid RTÉ don mbliain 2011 agus ní amháin go léiríonn RTÉ ann a tiomantas do chlársceidealú na Gaeilge ach go seasann sí lena tiomantas ann freisin.

Leagann Alt 120 ar RTÉ mar dhualgas cothrom uair an chloig de chláir in aghaidh an lae a sholáthair i ngach bliain féilire ar amanna arna n-aontú agus ar oiread arna aontú a oireann don dhá chraoltóir. Tuairiscíonn RTÉ faoin leibhéal tacaíochta a chuireann sí ar fáil do TG4 ina Tuarascáil Bhliantúil agus sna Ráitis Airgeadais Bhliantúla don Ghrúpa.

Foráiltear faoi Alt 98 go mbeidh RTÉ neamhspleách agus í i mbun a cuid cuspóirí a chur i bhfeidhm, faoi réir ceanglas an Achta, agus uaidh sin níl aon gnó agamsa, i gcáil dom mar Aire, i mbainistíocht ar chúrsaí RTÉ ó lá go lá, agus cúrsaí a bhaineann lena cuid craolacháin i leith na Gaeilge san áireamh. I gcáil dom mar Aire, áfach, táim go hiomlán sásta go bhfuil RTÉ ag comhlíonadh a cuid dualgas i leith na Gaeilge, mura bhfuil sí ag dul thairis sin. Rud eile dhe, creidim go bhfuil an reachtaíocht láidir go leor chun féachaint chuige go leanann RTÉ d'athláithriú agus de chur chun cinn na Gaeilge.