Gerard Murphy (Cork North West, Fine Gael)
Link to this: Individually | In context

Question 461: To ask the Aire Gnóthaí Pobail, Tuaithe agus Gaeltachta cén ról atá ag an Roinn, ag Údarás na Gaeltachta agus ag Foras na Gaeilge maidir le cur chun cinn na Gaeilge laistigh agus lasmuigh, den Ghaeltacht agus den Chóras Oideachais. [33136/06]

Éamon Ó Cuív (Galway West, Fianna Fail)
Link to this: Individually | In context

Mar ár dteanga náisiúnta agus an chéad teanga oifigiúil faoin mBunreacht, tá sé mar pholasaí ag an Rialtas tacaíocht dhearfach a sholáthar don Ghaeilge agus don Ghaeltacht. Dá réir sin, mar atá leagtha síos i Ráiteas Straitéise mo Roinne 2005-07, is tosaíocht ar leith do mo Roinnse: an Ghaeilge a thacú agus a láidriú mar phríomhtheanga an teaghlaigh agus an phobail sa Ghaeltacht; agus úsáid na Gaeilge a mhéadú ar fud na tíre.

D'fhonn an straitéis seo a chur chun cinn, feidhmíonn mo Roinnse go díreach trí scéimeanna agus tionscnaimh tacúla a fheidhmiú ar mhaithe leis an nGaeilge, laistigh agus lasmuigh den Ghaeltacht. Cuirtear béim ar leith freisin ar chur i bhfeidhm Acht na dTeangacha Oifigiúla 2003, ar bhonn céimiúil. Chomh maith leis sin, cuireann mo Roinnse tacaíocht ar fáil d'Údarás na Gaeltachta agus d'Fhoras na Gaeilge d'fhonn cabhrú leo a gcuid feidhmeanna reachtúla i leith na Gaeilge a chur chun cinn.

Tá feidhm reachtúil Údarás na Gaeltachta maidir le cur chun cinn na Gaeilge sa Ghaeltacht sonraithe sa reachtaíocht faoina fheidhmíonn an eagraíocht (Achtanna Údarás na Gaeltachta 1979-1999). Tá cur síos ar bheartais reatha an Údaráis ina Bheartas Forbartha 2005-2010, atá ar fáil ar an suíomh idirlíon www.udaras.ie. Tugtar léargas cuimsitheach ar ghníomhaíochtaí na heagraíochta i dTuarascáil Bhliantúil agus Cuntais Údarás na Gaeltachta a leagtar faoi bhráid Thithe an Oireachtais gach bhliain agus atá ar fáil ar an suíomh idirlíon freisin.

Bunaíodh Foras na Gaeilge faoin Acht um Chomhaontú na Breataine-na hÉireann 1999 agus tá na feidhmeanna seo a leanas aige faoin Acht sin: an Ghaeilge a chur chun cinn: úsáid na Gaeilge a éascú agus a spreagadh sa chaint agus sa scríbhneoireacht sa saol poiblí agus sa saol príobháideach sa Deisceart agus, i gcomhthéacs Chuid III den Chairt Eorpach do Theangacha Réigiúnacha nó Mionlaigh, i dTuaisceart Éireann mar a mbeidh éileamh cuí ann; comhairle a thabhairt don dá lucht riaracháin, do chomhlachtaí poiblí agus do ghrúpaí eile san earnáil phríobháideach agus dheonach; tionscadail tacaíochta a ghabháil de láimh, agus cúnamh deontais a thabhairt do chomhlachtaí agus do ghrúpaí de réir mar a mheasfar is gá; taighde, feachtais, tionscnaimh, agus caidreamh poiblí agus caidreamh leis na meáin, a ghabháil de láimh; téarmaíocht agus foclóirí a fhorbairt; agus tacú le hoideachas trí mheán na Gaeilge agus le múineadh na Gaeilge.

Cuimsíonn feidhmeanna an Fhorais na feidhmeanna a bhíodh ag iar-Bhord na Gaeilge chomh maith. Tá cur síos ar obair an Fhorais ar a shuíomh idirlíon www.forasnagaeilge.ie. Tuigfidh an Teachta, ar ndóigh, gur ar an Roinn Oideachais agus Eolaíochta atá an phríomh-fhreagracht maidir leis an nGaeilge sa chóras oideachais.