Pádraig Ó Céidigh (Independent) | Oireachtas source

Tá go leor eile le rá agam, ach críochnóidh mé i gceann nóiméad nó dhó. Is fiú aird a tharraingt ar an méid a dúirt an tIar-Choimisinéir Teanga, Seán Ó Cuirreáin, le comhchoiste Oireachtais go gairid sular éirigh sé as oifig maidir le cur i bhfeidhm na straitéise don teanga. Labhair mé leis an Uasal Ó Cuirreáin ina dhiaidh sin. Dúirt sé, mar gheall nach ndéantar aon iniúchadh nó athbhreithniú neamhspleách ar chur i bhfeidhim na straitéise 20 bliain don teanga, níl aon shoiléireacht againn ar cé chomh éifeachtach is atá sé. Ní gá ach Google a úsáid le breathnú ar thorthaí an daonáirimh ó 2011 agus 2016 le foghlaim go bhfuilimid ag dul an treo mícheart, faraoir. Creidim san Aire Stáit. I believe in the Minister of State. Tá a fhios agam go ndéanfaidh sé chuile iarracht. Is minic a rinne mé botún. Tá go leor daoine a dhéanann botúin. Má tá rud éigin mícheart - nílim ag rá go bhfuil botúin á ndéanamh ag an Aire Stáit - is é an rud is fearr le déanamh ná tosú arís. Mholfainn go láidir don Aire Stáit athbhreithniú a dhéanamh ar an méid atá ar siúl faoi láthair agus tosú arís le straitéis nua ó thaobh na Gaeilge de.