Aengus Ó Snodaigh (Dublin South Central, Sinn Fein) | Oireachtas source

Nílim ag cur srian ar éinne, nó ar aon choimisiún a bheidh ag roghnú daoine, i mo leasú. Labhróidh an Teachta Ó Cuív faoina leasú, ach ní dóigh liom go bhfuil sé ag cur srian ar éinne ach oiread. De réir an Bhille mar atá sé faoi láthair, is féidir leis an gcoimisiún "cibé daoine is cuí leis .... a bhfuil .... taithí oiriúnach acu, a cheapadh". Tosnaíonn mo leasú leis na focail "i measc na ndaoine ar an gcoiste". Níl srian i gceist. Nílimid ach ag rá gur cheart go mbeadh roinnt dóibh siúd ar an gcoiste. Anuas ar sin, d'fhéadfadh an coimisiún duine ar bith gur mhian leo a roghnú. Is trua é nach bhfuil an dream atá luaite agam, ar a laghad, le sonrú sa Bhille. B'fhéidir go dtiocfaidh siad. Níl mé ag rá nach dtiocfaidh siad. Is dóigh liom gur cheart tús áite a thabhairt dóibh ó thaobh an dlí de. B'fhéidir nach bhfuil an liosta is fearr curtha le chéile agam, ach measaim gur chóir treoir a leagadh síos go reachtúil don choimisiún.

See this speech in context