Peadar Tóibín (Meath West, Sinn Fein) | Oireachtas source

Is ábhar tábhachtach é seo agus is ábhar mór imní é freisin do mhuintir Oileáin Árann. Mar is eol don Aire Stáit, tá muintir na n-oileán anseo i mBaile Átha Cliath inniu le haghaidh preas ócáid ar an ábhar seo. Dúirt an tAire Stáit le pobal Oileáin Árann go n-ardódh sé an cheist seo leis an Aire Caiteachais Phoiblí agus Athchóirithe, an Teachta Howlin, agus go mbualadh sé leis an tseachtain seo caite. Ar bhuail an tAire Stáit leis maidir leis an cheist seo agus cad a dúirt an tAire leis? Ar chuir an tAire Stáit an cheist ar an Aire agus cén freagra a thug sé ar an ábhar tábhachtach seo?

Is léir go ndéanfaidh aon chinneadh a ísleoidh an t-airgead atá ag dul do na seirbhísí seo an-damáiste do mhuintir Oileáin Árann. Ceapann an coiste atá i gceannas ar na hoileáin go n-imeodh thart ar 20% den phobal ón Inis Mór go fadtéarmach muna mbeadh an tseirbhís seo i bhfeidhm. Is bagairt mór an cinneadh seo do thodhchaí an oileáin agus do chúrsaí sláinte agus oideachais ar an oileán. Tá sé an deacair do sheandaoine agus daoine tinn dul ar an mbád i rith an gheimhridh nuair a bhíonn drochaimsear ann. Caithfear seirbhís mar seo a choinneáil i bhfeidhm agus caithfidh cruinneas a bheith ann fúithi.

Ba chóir go mbeadh an tAire Stáit sásta a rá inniu go rachaidh an tseirbhís se ar aghaidh go fadtéarmach agus nach bhfuil aon bhagairt uirthi.

See this speech in context