Dinny McGinley (Donegal South West, Fine Gael)

Mar a dúirt mé cheana agus mar a déarfaidh mé arís é, tá an Coimisinéir Teanga ann agus obair fhiúntach ar siúl aige, agus mairfidh an post sin, is cuma cad a tharlóidh. Tá cinneadh déanta go rachaidh sé isteach le Oifig an Ombudsman, agus san athbhreithniú ar an Acht Teanga, tá ról an coimisinéara á athbhreithniú chomh maith. Ní rud úr é sin. Dúirt an Rialtas go mbeadh muid ag cur eagraíochtaí éagsúla le chéile a bhfuil an cuspóir céanna acu, amharc i ndiaidh riachtanais agus cearta an phobail. Sílim go bhféadfadh an Coimisinéir Teanga agus Oifig Bean nó Fear an Phobail, ag obair le chéile, a bheith an-éifeachtach. Sin an cinneadh atá déanta. Tá an ról anois á athbhreithniú leis na highneachtaí atá ag teacht isteach agus feicfidh muid go léir cad a thiocfaidh as san am atá amach romhainn. An t-aon rud gur féidir liom a rá nó, chomh fada agus a bhaineann sé liomsa, fanfaidh an coimisinéir agus beidh an chosaint chéanna ag an teanga faoi eite an Ombudsman agus atá aige i láthair na huaire faoi eite an coimisinéara. Má bhíonn an bheirt ag gníomhú le chéile, b'fhéidir go mbeidh siad fiú amháin níos éifeachtaí.

See this speech in context