Mr. Stiof?n Seoighe:

Is dócha go bhfuil baint aige sin le ceist na scoileanna chomh maith mar táimid ag labhairt ar cé chomh tábhacht is atá na bunscoileanna Gaeltachta ach go háirid. Tá an t-ádh orainn go bhfuil cúig bhunscoil inár gceantar féin agus iad ar fad ag feidhmiú trí mheán na Gaeilge. Tá sé ráite ag muintir na háite go bhfuil difríocht ollmhór feicthe acu i measc na ndaoine óga ó thaobh leibhéal Gaeilge. Feiceann siad cé chomh muiníneach is atá siad agus an tuiscint atá acu ar an nGaeilge, rud nach raibh ann deich nó 15 bliain ó shin. Ach tá na scoileanna faoi bhrú ó thaobh uimhreacha de. Bhí feachtas iontach ar siúl ag an scoil náisiúnta ar an gCloch Bhreac anuraidh, agus bhí sé ar siúl i gcúpla Gaeltacht eile chomh maith. Bhí an t-ádh orthu gur chuir cúpla duine áitiúil teach ar fáil dóibh le ligint amach ar cíos do theaghlach le gasúir bhunscoile agus d'éirigh leo leis an bhfeachtas sin. Murach an feachtas sin, agus is í an scoil féin a chur tús leis agus thacaigh an comharchumann agus coistí áitiúla léi, bheadh an scoil sin i mbaol múinteoir a chailliúint agus b'fhéidir faoi cheann cúpla bliain eile go mbeadh sé dúnta ar fad. Níl aon rud sa phobal ach bunscoil.