Mr. Victor Bayda:

Is é an bunlíne atá ann ná go gcaithfidh an bord a bheith daonlathach agus ionadaíoch. An cheist atá agamsa ná cén moladh atá ag an gcoiste conas ionadaíocht Uíbh Ráthaigh ar bhord an údaráis a chinntiú? Ceapaim go raibh an córas a bhí ann i bhfad níos fearr nuair a bhí 20 ann agus nuair nach raibh ach triúr ainmnithe. Bhí sé i bhfad níos féaráilte ná mar atá anois. Ní féidir le deichniúr tofa a bheith ionadaíoch. Gan dabht, is mór an míchothromaíocht atá ann nuair nach bhfuil ach triúr ó Chonamara agus beirt ó Dhún na nGall agus ansin duine amháin ó Chontae na Mí. An bhfuil daoine ag teacht ó Chonamara ag rá go bhfuil sé sin mícheart cé go bhfuil difríocht ollmhór idir Chonamara nó Gaillimh agus Contae na Mí?

An cheist atá agamsa leis an gcás seo ná, mar a dúirt mé, ná gurb é an bunlíne ná go mbeadh sé daonlathach agus go mbeadh ionadaíocht do gach pobal ann. Is dhá cheantar iomlán difriúil iad Uíbh Ráthach agus Corca Dhuibhne, Nuair a bhí beirt ar bhord an údaráis ní raibh sé cothrom d'Uíbh Ráthach ach an oiread. Ní raibh daoine ó Uíbh Ráthach tofa ar an mbord agus daoine ó Chiarraí thiar, den chuid is mó, a bhí ann. Conas is féidir linn a chinntiú go bhfuil na hiarrachtaí ar fad atá á ndéanamh ag pobal Uíbh Ráthaigh caomhnaithe? Fiú agus é an-lag, tá an-teacht aniar ann agus is féidir liom na figiúirí ar fad a chur ar fáil don choiste chun é sin a léiriú. Conas is féidir linn ionadaíocht phobal Uíbh Ráthaigh a chinntiú ar bhord Údarás na Gaeltachta?