Éamon Ó Cuív (Galway West, Fianna Fail)
Link to this: Individually | In context | Oireachtas source

Tógadh Céim an Choiste agus Céim na Tuarascála le chéile. Ní fhéadfaí é a phlé laistigh de dhá uair a chloig. Cuirfidh mé mo cheist dheiridh. Tá an fharraige agus chuile shórt ann ach an aontódh na finnéithe, ag deireadh an lae, gurb í an teanga an acmhainn nádúrtha is saibhre agus is luachmhaire atá ag an nGaeltacht, go mór mór toisc gur tharla nach bhfuil an teanga in aon áit eile ar domhan? Tá an fharraige i go leor áiteanna. Tá go leor rudaí i go leor áiteanna ach níl an Ghaeilge mar theanga phobail iontu. An aontóidís go mba cheart céatadán den airgead a chur ar leataobh an t-am ar fad le haghaidh tionscadal teangalárnaithe? Tá go leor de sin déanta ag an údarás. Tá tionscal mór closamhairc bunaithe aige agus mar sin de. Bhí leagan amach ann faoina mbeadh minimum de 30% den airgead le caitheamh ar thograí teangalárnaithe. Ní fhéadfá éalú as seo trí bheith ag caint faoi chultúr go ginearálta. Tá mise amhrasach faoin bhfocal "cultúr" mar bhí rud curtha in Acht pleanála faoi dhaoine a raibh cultúr nó teanga faoi leith acu ach d'fhéadfá a rá go bhfuil sé sin ag muintir Chill Chainnigh. Nach bhfuil cultúr faoi leith acu san iománaíocht? An ceart go mbeadh minimum d'airgead curtha ar fáil le haghaidh tograí teangalárnaithe? Is é sin an méid.