Catherine Martin (Dublin Rathdown, Green Party)
Link to this: Individually | In context | Oireachtas source

Tá tuarascáil an Choimisiún um Thodhchaí na Meán againn. Tá glactha ag an Rialtas i bprionsabal le 49 as an 50 moladh a rinne an choimisiún. Dhiúltaigh an Rialtas don mholadh aistriú go samhail a bheadh á maoiniú go hiomlán ag an státchiste. Rinneadh sin go príomha ar mhaithe le ceangal díreach a choinneáil idir na meáin agus an pobal ar a mbíonn siad ag freastal, agus chun an baol a laghdú go mbeadh tionchar á imirt ag an bpolaitíocht ar neamhspleáchas na meán, nó go measfaí go mbeadh. Bhunaigh an Rialtas meitheal oibre theicniúil chun roghanna a mheas maidir leis an gceadúnas teilifíse a leasú. Is ceist chasta í seo ach tá obair na meithle tagtha chun críche anois agus tá tuarascáil curtha ar aghaidh aici. Cuirfidh mé an tuarascáil sin faoi bhráid an Rialtais sna seachtainí atá amach romhainn.