Ms Sorcha Ní Chéilleachair:

Rinneadh athbhreithniú dhá bhliain ó shin agus is cúis mhór díomá é. Moladh ceisteanna mar gheall ar an nGaeilge agus bhíomar féin ag caint leis an oifig ina dhiaidh sin ach diúltaíodh do na ceisteanna agus táimid féin den tuairim nach ndearnadh tástáil cheart ar na ceisteanna. Bhí ceist ann mar gheall ar an teanga bhaile, mar shampla, nó ceist an-chosúil leis sin, ach níor tástáladh í i gceantar Gaeltachta, áit a mbeadh dlús daonra ann agus a bhféadfaí tástáil cheart a dhéanamh air. Bhí an-díomá orainn mar gheall nach ndearnadh an tástáil sin agus nár tugadh seans di nuair a rinneadh an t-athbhreithniú dhá bhliain ó shin. Tá ceist bhreise Ghaeilge ann don bhliain seo chugainn ach ní hiad na ceisteanna a bhí uainn atá ann.