Ms Bairbre Uí Theighneáin:

Is é an t-aon rud, nuair atáimid ag caint faoi rud náisiúnta, ná go bhfuil líne eolais náisiúnta ar fáil as Gaeilge do dhaoine agus faighimid glaonna ar an líne sin. Is iad na rudaí is mó a iarrann daoine ná eolas faoi chártaí leighis, chártaí Eorpacha árachais sláinte agus chártaí aisíocaíochtaí drugaí. Is é sin an rud céanna a tharlaíonn ar an líne as Béarla a tharlaíonn leis na Gaeilgeoirí. Tagann siad ó chuile chearn den tír. Tá siad ag leanúint ar aghaidh ag déanamh iarratas ar na seirbhísí sin, ar chártaí leighis agus a leithéidí a fháil, ach níl aon iarratas tagtha isteach ar sheirbhís seachas an tseirbhís chothrom na Féinne nó fair deal. Fuaireamar cúpla iarratas i mbliana air sin. Go dtí seo, is iad na trí cinn eile na príomhrudaí a iarrann daoine orthu ar bhonn náisiúnta.