Thomas Byrne (Meath East, Fianna Fail) | Oireachtas source

Tá plean náisiúnta maidir leis an earcaíocht agus an Ghaeilge sa Stát. Tá sé sin chun a bheith críochnaithe agus foilsithe agus tabharfaidh sé sin stiúradh dúinn agus don státchóras uilig conas déileáil le suíomhanna cosúil leis sin. Níl mé ag iarraidh a bheith pearsanta faoi ach an oiread. Níl mé freagrach as an earcaíocht sin. Tá an eiseamláir ann leis an Teachta McHugh óna thréimhse mar Aire. Ní raibh focal Gaeilge aige agus tá Gaeilge níos fearr aige ná aon duine againn. D’fhoghlaim sé an Ghaeilge. Má tá freagrachtaí ar dhaoine i bpostanna sinsearacha maidir le cúrsaí Gaeltachta nó Gaeilge, má tá sé sin faoina mbráid, tá dualgas mórálach acu Gaeilge a fhoghlaim. Bheinn ag rá leo go bhfuil an eiseamláir ann leis an Teachta McHugh.

Beidh plean náisiúnta againn. Tá an stiúir tugtha dúinn ansin. Tá sé seo go léir chun athrú ar aon nós maidir leis na spriocanna atá san Acht teanga. Tá gréasán á sheoladh do státseirbhísigh a bhfuil Gaeilge acu. Beidh mise ag seoladh an ghréasáin sin. Tá súil agam go mbeidh an gréasán seo oscailte do dhaoine a bhfuil Gaeilge nádúrtha agus líofa acu agus do dhaoine atá ag iarraidh Gaeilge a fhoghlaim freisin. Sheol mé gréasán roinnt blianta ó shin maidir leis an bhFraincis - gréasán de státseirbhísigh a bhfuil Fraincis acu - ionas go mbeadh muid in ann níos mó daoine a chur isteach sa chóras Eorpach go háirithe. Tá muid ag déanamh an rud céanna leis an nGaeilge. Tá súil agam go mbeidh daoine, ar nós na ndaoine sna poist atá á lua ag an Teachta Connolly, sásta dul isteach sa ghréasán. Tá súil agam go mbeidh branches den ghréasán ar fud na tíre. Measaim go mbeidh a lán éilimh ar an ngréasán seo agus beidh daoine ag iarraidh dul isteach sa ghréasán seo. Níl aon deacracht agam le duine nach bhfuil Gaeilge aige nó aici - tá fáthanna éagsúla le sin - ach tá a lán daoine ag iarraidh an Ghaeilge a fhoghlaim. Is féidir liom daoine a fheiceáil á dhéanamh sin. Tá daoine anois sa státchóras ag foghlaim Gaeilge mar tá a fhios acu go bhfuil buntáiste léi. Tá buntáiste reachtaíochta acu.