Thomas Byrne (Meath East, Fianna Fail) | Oireachtas source

Measaim gur ceisteanna iad do Fhoras na Gaeilge. Níl mé ag iarraidh rith ó na ceisteanna ach caithfidh sé scéimeanna a bheith aige a mheastar a bheadh riachtanach a reáchtáil mar chuid dá chúraim i leith na foilsitheoireachta. Tá scéim na gcoimisiún ag Foras na Gaeilge don tréimhse 2023 go 2025 agus tá béim ar dhéag-litríocht an babhta seo. Bronnadh coimisiún ar dheichniúr scríbhneoir faoi stiúir trí fhoilsitheoir sa scéim seo. Bíonn sealanna i gceist leis an scéim meantóireachta agus scéim na gcoimisiún de thairbhe maoinithe agus acmhainní foirne. Bíonn ar a laghad dhá bhliain ag teastáil ó scríbhneoirí chun saothar a chur i gcrích. Bíonn seans i gcónaí nach mbeidh an t-iomlán réidh laistigh den tréimhse conartha. Uaireanta, tarlaíonn sé sin. Tuigim go bhfuil scéim nua meantóireachta beartaithe ag Foras na Gaeilge a bheadh dírithe ar eagarthóirí ach tá sé ag fanacht ar an maoiniú.