Catherine Connolly (Galway West, Independent) | Oireachtas source

Ní raibh mé ag iarraidh dul ar dtús ach rachaidh mé ar aghaidh. Gabhaim buíochas leis an Aire Stáit. Is maith an rud é go bhfuil sé anseo. Cuirim fáilte roimhe agus tá súil agam go n-éireoidh leis ina ról nua, mar a dúirt mé cheana. Chríochnaigh muid an tuarascáil i mí Dheireadh Fómhair na bliana seo caite tar éis próiseas fada. Bhí 11 cruinniú againn. Níor tharla sé seo thar oíche. B'fhéidir go bhfuil a fhios ag an gcléireach cé mhéad aighneacht scríofa a fuair muid. Thugamar cuireadh do dhaoine aighneachtaí scríofa a chur isteach. Ní saineolaí mé agus ní raibh eolas agam faoin earnáil seo ach tá anois tar éis na gcruinnithe sin agus tar éis an mhéid atá cloiste agam.

Tá ráite ag an Aire Stáit go bhfuil sé luaite sa tuarascáil go bhfuil géarchéim in earnáil na foilsitheoireachta agus nach n-aontaíonn sé leis sin. Ní hiad sin na focail a d'úsáid muidne. Is é an teachtaireacht ó na daoine a tháinig os ár gcomhair ná go bhfuil géarchéim ann. Ba chóir breathnú air sin. An bhfuil an tuarascáil léite ag an Aire Stáit? Tá 110 moladh ann ach níl i gceist ach deich bpríomh-mholadh ar dtús. An raibh deis ag an Aire Stáit é a léamh? Cén fáth nach n-aontaíonn sé, in ainneoin na fianaise, go bhfuil géarchéim ann? Níl na moltaí uilig dírithe ar a Roinn nó ar a ról mar Aire Stáit.

Níl i gceist ach b’fhéidir deich nó 15 cinn. An raibh deis ag an Aire Stáit a shúil a chaitheamh ar na moltaí sin?