Aengus Ó Snodaigh (Dublin South Central, Sinn Fein) | Oireachtas source

Is é sin an deireadh ráite. Níl fiú deis agam na ceisteanna agus na freagraí ar fad a thabhairt do na finnéithe.

An fáth gur tharraing muid na finnéithe anseo inniu ná chun aitheantas a thabhairt daoibh ar fad. Tá a fhios againne atá báúil don Ghaeilge, mar dhíograiseoirí Gaeilge nó mar ghníomhaí ó thaobh na Gaeilge de an obair ar fad atá á dhéanamh agaibh. Fáth eile ná chun deis a thabhairt do na finnéithe labhairt leis an bpobal anseo agus i gcoitinne, ach aitheantas atá i gceist againn ach go háirithe. Is í seo an dara Dáil ina bhfuil sainchoiste don Ghaeilge ag feidhmiú. Tá an coiste seo ag déanamh iarracht camchuairt a dhéanamh mar chuid de. Táimid tar éis freastal ar a lán ceantair Gaeltachta go dtí seo. Ach chomh maith leis sin, táimid ag iarraidh cé chomh hilghníomhach is atá daoine ó thaobh na Gaeilge de a léiriú. Ní hé seo an deireadh. Is é seo an tús agus beidh muid i dteangmháil leis na finnéithe ar fad. Má smaoiníonn na finnéithe ar aon rud maidir leis an gceist seo, is féidir leo nóta breise a chur.

An tseachtain seo chugainn táimid ag bualadh leo siúd atá ag déanamh an phleanáil teanga laistigh den Ghaeltacht chomh maith céanna. Tá sé i gceist againn ár dtuairimí agus tuairimí na bhfinnéithe a roinnt leis na hAirí, an Rialtas agus an Dáil amach anseo. Tá sé i gceist againn go mbeidh tuairisc ag teacht tar éis na hoibre seo. Mar tá a lán tuairiscí scríofa agus roinnte againn leis an Rialtas ar feadh tamall. Tá a lán moltaí déanta. Caithfimid tosú a dhéanamh ticeáil ar na boscaí ar fad le féachaint cad iad na cinn atá comhlíonta. Glacaim féin leis go bhfuil fíorbheagán acu comhlíonta ag an stad seo. Tá píosa ama againn sula gcuirfimid deireadh leis an gcuid seo. Beidh cruinniú againn an tseachtain seo chugainn.

Tógfaidh mise an deis seo mo bhuíochas a ghabháil leis na finnéithe ar fad as a smaointe, a dtuairimí agus an obair ar fad atá á déanamh acu agus tá súil againn go leanfaidís léi. Tá buíochas ag dul do Mhicheál Ó Mainín, Joe Ó Dochartaigh, Niall Ó Catháin, Aoife Ní Chaiside, Siobhain Grogan, Sarah Walsh, Aoife de Faoite, Brian Ó Gáibhín, Seán Ó Laoi, Ciarán Mac Giolla Bhéin, Feargal Mac Ionnrachtaigh, Sorcha Ní Chathmhaoil, Tomás de Buitléir, Dónal Ó hAiniféin agus Domhnall Ó Loinsigh.

Go raibh míle maith agaibh.

Beidh an chéad cruinniú eile againn an tseachtain seo chugainn i seisiún poiblí ar 1.30 p.m., Dé Céadaoin, an 8 Bealtaine i seomra coiste a 4, nuair a phléfear an t-ábhar pleanáil teanga lastigh den Ghaeltacht leis na hoifigigh pleanála teanga ó Dhún na nGall theas, iarthar chathair na Gaillimhe, an tEachréidh, Oileán Chléire, Dúiche Sheoigheach, Tuar Mhic Éadaigh, na Déise, Ráth Chairn, Baile Ghib agus Ciarraí theas. Beidh seisiún fada eile againn an tseachtain seo chugainn. Leis sin ar fad ráite, tá an cruinniú seo ar athló go dtí 1.30 p.m., an Céadaoin seo chugainn, an 8 Bealtaine.