Mr. Traolach ? Donnabh?in:

Gabhaim buíochas leis an gCathaoirleach. Gabhaim féin agus Carmel Nic Airt, atá anseo liom ó Chloich na Coillte i gContae Chorcaí, buíochas leis an gcomhchoiste as an deis a bhronnadh orainn teacht os comhair an choiste seo mar ionadaithe choiste stiúrtha Ghaelcholáiste iarthar Chorcaí. Tá an coiste stiúrtha seo i mbun iarrachtaí ó 2016 i leith Gaelcholáiste a bhunú le freastal ar dhaltaí na bunscoileanna lán-Ghaeilge, cúig scoil ina iomlán, in iarthar Chorcaí. Tá Cloich na Coillte suite i gceartlár iarthar Chorcaí, dúthaigh ina bhfuil Droichead na Bandan, An Sciobairín agus Beanntraí, bailte ina bhfuil scoileanna lán-Ghaeilge ag fás agus ag forbairt ó 1994 ar aghaidh. Sa cheantar leis, tá Oileán Chléire, ceantar Gaeltachta, áit ina bhfuil bunscoil lán-Ghaeilge chomh maith.