Mr. Caoimh?n ? hEaghra:

Ó thaobh an Fhorais Phátrúnachta agus an taithí atá againn óna bheith ag plé le haonaid, tá dúshlán mór millteach ag baint le feidhmiú aonad. Déarfaidh mé arís, dá mbeadh aon duine ag tosú amach anois ag breathnú ar cheantar agus ag iarraidh oideachas lán-Ghaeilge a chur ar fáil dó, ní dóigh liom go mbeadh muid san fhoras ag breathnú ar aonad mar an chéad rogha. Bheimis ag breathnú i gcónaí i dtreo scoil neamhspleách. Is é an pointe atá taobh thiar de seo ar fad ná, nuair a thagann éileamh ar oideachas lán-Ghaeilge ag an dara leibhéal agus nuair atá na polasaithe agus an cur chuige seo ag an Roinn agus sa chlár Rialtais na figiúirí atá sa Ghaelscolaíocht a dhúbailt, oideachas lán-Ghaeilge a chur ar fáil do thuismitheoirí gur mian leo é agus chuile shórt mar sin, ba cheart go mbeadh an Roinn ag breathnú ar inmharthanacht na nGaelcholáistí seo agus ag leagan síos cur chuige ina gcinnteofaí nach mbeadh ceist ann ach go mbeadh freastal ann ó na Gaelscoileanna ag an mbunleibhéal chun a chinntiú go bhfuil sruth páistí ann d'aon Gaelcholáiste bheag atá á tosú. Tá sé sin feicthe agus aitheanta ag an bhforas sna hiarratais atá curtha isteach ag an Roinn sna ceantair, mar shampla, i gCaisleán an Bharraigh, i lár tíre, i Sord agus i mBaile Átha Cliath 2, 4, 6 agus 8. Tá siad seo ar fad inmharthana. Is é sin an córas gur cheart a bheith ann. Tá súil againn go mbeadh sé sin ag teacht chun cinn sa bpolasaí don oideachas lán-Ghaeilge.