Ms Clare Sp?inneach:

Ní raibh Gaeloideachas sásta leis an bpróiseas comhairliúcháin ar roinnt mhaith chúiseanna. Bhraith muid go raibh dhá mhórphíosa taighde in easnamh agus tá siad in easnamh go fóill, ainneoin go bhfuil an comhairliúchán, mar dhea, curtha i gcrích. Is iad sin an tuairisc ar na haonaid nach bhfuil foilsithe go fóill, ach de réir mar a thuigimid atá curtha i gcrích, agus freisin, tuairisc ó na cigirí sa Roinn Oideachas ar na luathbhlianta agus na naíonraí lasmuigh den Ghaeltacht. Ní dóigh liom go bhfuil an píosa oibre sin curtha i gcrích go fóill agus ní raibh sé fiú beartaithe nuair a cuireadh tús leis an bpróiseas comhairliúcháin.

Bhraith muid go raibh an comhairliúchán an-saintreorach ó thaobh na Roinne de agus nach raibh na ceistneoirí a scaipeadh in oiriúint do pháistí scoile, ainneoin gurb iadsan an pobal go bhfuil an próiseas seo ceaptha a bheith ag freastal orthu. Is cinnte nár déanadh aon chomhairliúchán le lucht na luathbhlianta. Ní raibh na ceistneoirí ar líne in oiriúint do pháistí bhunscoile. Is ar éigin go rabhadar in oiriúint do pháistí iarbhunscoile. Rinneamar roinnt oibre ag iarraidh na scoileanna agus na múinteoirí a chumasú le go bhféadfaidís na páistí a thabhairt tríd an bpróiseas comhairliúcháin dá mba mhian leo é, ach bhí go leor lochtanna ar an bpróiseas dár linne.