Mr. Cormac McCashin:

Ba mhaith liom an pointe a rinne an Teachta maidir leis an gá le polasaí nua a thabhairt isteach a fhreagairt. Sílim go bhfuil sé aitheanta sa seisiún seo go bhfuil polasaithe ann. Tá an ceart ag an Teachta. Tugadh polasaí isteach in 2006. Tá sé ann go fóill. Níl sé curtha ar ceal ag aon duine. Tá na rudaí dearfacha seo sa chlár Rialtais. Tá rudaí dearfacha i leith na ceiste seo is cuma cén áit a mbreathnaíonn tú. Is í an fhadhb ná nach é polasaí atá ag teastáil. Teastaíonn rud éigin difriúil gur féidir leis a chinntiú go leanfaidh rialtas ar bith na gealltanais atá tugtha. Le polasaí, ní féidir an Rialtas a thabhairt os comhair an Choimisinéara Teanga ná os comhair na cúirte agus a rá go bhfuil dualgas reachtúil air é seo a chur i bhfeidhm. Dá dtabharfaí reachtaíocht isteach, mar shampla, bheadh tú in ann toradh níos fearr a chinntiú nuair atá dualgas reachtúil ar an Roinn Oideachais rud éigin a dhéanamh. Tá an Roinn an-chumasach agus tá sí in ann rudaí a bhaint amach má tá dualgas uirthi. Níl dualgas uirthi i leith na rudaí atá sa chlár Rialtais. Is cineál mianta iad sin. Is é sin an fáth gur gá dúinn foghlaim ón teip atá ann go dtí seo agus ó na fadhbanna atá aitheanta agus atá ag dul ar aghaidh agus ar aghaidh agus a rá nach féidir linn brath ar Aire amháin, ar státseirbhíseach sa Roinn nó ar pholasaí. Is gá anois féachaint ar rud éigin nua a thabhairt isteach a thabharfadh ceart do dhaoine chun go bhféadfaidís an Stát a choinneáil cuntasach nuair atá an ceart sin á dhiúltú. Is éileamh i bhfad níos mó ná polasaí a fháil scríofa é sin ach, mar a d'aithin an Teachta, bhí agus tá polasaithe ann ach níl aon bhealach againn ar an taobh seo atá ag troid ar son na dtuismitheoirí sna ceantair a chinntiú go gcuirtear na mianta maithe sin i bhfeidhm.