Mr. Julian de Sp?inn:

Le tagairt a dhéanamh do rud a luaigh an Teachta, aontaím go huile agus go hiomlán leis gur fadhb é go bhfuil an córas briste. Nuair atá sé mar thoil ag an Roinn Oideachais rud éigin a dhéanamh, is féidir léi. Mar shampla, is scoileanna ilchreidmheacha iad gach scoil nua a cuireadh ar bun le deich mbliana anuas. Tá an Roinn ag aithint go bhfuil an pobal ag iarraidh go mbeidh scoileanna ilchreidmheacha mar rogha acu ach níl sí ag cur na Gaeilge san áireamh ansin. Cé go bhfuil an sprioc sin ag an Rialtas ó 2006 ar aghaidh, mar a luaigh an Teachta, níl an Roinn ag feidhmiú air. Luaigh an Teachta an clár Rialtais. Táimid ag iarraidh beagáinín tagairt a dhéanamh dó sin. Tá an clár Rialtais atá ann faoi láthair ag caint faoi líon na ndaltaí atá sna scoileanna a dhúbailt ach níl an Roinn ag feidhmiú air sin. Níl sí ag feidhmiú ar an éileamh atá luaite sa chlár Rialtais freisin ná ar an gceann eile atá ann maidir leis an bpáirt-tumoideachas a bhí le bheith i ngach scoil. Tá rud éigin i gcóras iomlán na Roinne Oideachais atá frith-Ghaeilge. Níl aon bhealach eile le breathnú air mar níl sí ag feidhmiú ar an gclár Rialtais atá ag na polaiteoirí atá le bheith i gceannas ar chlár oibre na Roinne. Níl sí ag feidhmiú air sin. Tá an Roinn Oideachais ag feidhmiú in aghaidh thoil an Rialtais faoi láthair mar nach bhfuil sí ag feidhmiú ar na rudaí atá geallta sa chlár Rialtais.